Jon 11:24-50

²⁴Mata ka kiliis u aragii, “Ia usum le in aptih fis sabin na aunbiing na apaptih fis na farfarop na biing.”

²⁵Iesu ka fas u aragii, “Iau tom e apaptih fis ke iau tom e liu, seh i unune lo iau, taftawa male in met, in liu sabin,

²⁶ma fanseh ri liu ma ri unune lo iau, biil in to met. O unune na sanih ia use u igii?”

²⁷Mata ka fas u aragii, “Tekentu kanaka, Kumguui, ia unune le wo Mesaia, ma wo e Kalalik ke God, ae keme usum le in la uga na piklinbat.”

²⁸Aunbiing Mata ka use ta u aragii, ka fis sabin ma ka kam fakum pes kisilik sing Maria, ke ka fas u le, “Tom fafausum igii, ma i diik isi wo.”

²⁹Aunbiing Maria ka ongen ta u arae, ka sangar suuh isi tafe u.

³⁰Iesu biil biitom i tapiek na maleh kiruh, isau le, i tinaiwa biitom na falifuh ae Mata i tafe ta u lo.

³¹Fan Iudaia ae ri batme ta Maria awii na fel, ri ka par u i sangsangar na aptih ma ka suuh, ke ri ka mi lo, wara le, ri wol le ka la una matanfat una luun minet isi teng.

³²Ke aunbiing Maria ka tapiek na falifuh ae Iesu tinaiwa lo, ka par u ma ka luut uf na famu lo Iesu ma ka tarah, “Kumguui, male wo ta tom aga, ke feneklik biil tom in met.”

³³Aunbiing Iesu ka par Maria i teng ke fan Iudaia ae ri la tura, ri ka teng sabin, ka purngis e bala ma ka ier isi teng.

³⁴Iesu ka diik ri le, “Fia gam ka faborong u wah?” Ri ka kiliis u aragii, “Kumguui, la ke ok par u.”

³⁵Ma Iesu ka teng.

³⁶Ke fan Iudaia ri ka tara, “Gam par u, i mais kanaka u tom.”

³⁷Isau le fal lo ri, ri ka tara le, “I sapeng tah na matan nenge kut. Isi sah biil ik lupes ta kaltu igii isi gong i met?”

³⁸Ka purngis sabin e bala Iesu, ke ka la una matanfat una luun minet. Matan fat ae, i e nenge matanfat ri babat kale u ini nenge tara na fat.

³⁹Iesu ka fas ri aragii, “Tel ufu fat ae.” Mata, fenelik e kaltu ae i met, ka tara, “Kumguui, ka fet tah e biing kale u ma igii ik mapuh tah.”

⁴⁰Ke Iesu ka tara sing i aragii, “Ia ka fas ta wo tah, male on unune, ke on par memeh ke God.”

⁴¹Ke ri ka tel ufu fat. Ke Iesu ka par una mawe ma ka tarah, “Tata, ia fot rokap lo wo wara le o ka ongen ta iau.

⁴²Ia ka usum tah le o wong fitliu sing iau. Isau le ia use u aragii, una rokap ken fanu igii ri sotih turang, isi rik unune le o wuun ta iau.”

⁴³Aunbiing Iesu ka use ta u aragii, ka perek aragii, “Lasarus, suuh ugapiek!”

⁴⁴Ma kaltu ae i met tah ka suuh, iun lima ke iun keke ri afit ta u ini kaen una afit minet, ke nenge kaen sabin ri fis ta u kale paklu. Ke Iesu ka fas ri aragii, “Gam puk ufu foron kaen ae lo, isi ik la.”

⁴⁵Pesu, ifuun e fan Iudaia ae ri la tah isi par Maria ri ka par sanih ae Iesu i fatapiek ta u, ma ri ka unune lo Iesu.

⁴⁶Isau le fal lo ri, ri ka la usuf foron Farasi ma ri ka fas ri ini sanih Iesu i tel ta u.

⁴⁷Ke foron famfamu ken foron pris ke foron Farasi, ri ka kam turim foron laulaumet ken fan Iudaia, ma ri ka diik ri aragii, “Sanih keren tel u? Kaltu igii ka famam tel ifuun mang e rakrakai na fakileng.

⁴⁸Male keren wol fofoes lon kaltu igii, ke fanu tikii rin unune lo, ke fan Rom rin la ma rik falaulau Felun Sising turan fanu tikii kirer.”

⁴⁹Isau le, neng lo ri, asa e Kaiapas, i laulaumet na pris lo e bet ae, ka fas ri aragii, “Biil gam usum na ti tier!

⁵⁰Biil gam par failiim u le, i e rokap kimi le in tikii e kaltu in kep salan fanu tikii, isi fanu tikii gong ri met.”