San Juan 11:24-50

²⁴Mártanan itsantie: —Chique mirayoe tie. To yucapiyarino mate uyanlanan mansonhilainasa, yanan mansonhino joeque mirayoe tie.

²⁵Junni Jesunan beconan pato itsantie: —Lari sonnasa carin, junsi puyaca junlaca mansonhisa carin, quimin joyoe tie. Labe cayaica junlari puyaca jominnan mansonhilaichunae tie.

²⁶Labe cayaica junlachi tenca numanan puyalaituchunae tie. ¿Junca quereiyun? tie.

²⁷Jesús tsantinan, Mártari itsanque tulanquee: —Miya, chiqueri quereiyoe. Nu jamochi nechi patano jomin Cristo joe. Nu Diosichi Nao joe. Junca quereica talari quereiyoe tie.

²⁸Marta tsantito manjito, yachi miyanbe nosale pato itsantinue: —Miya jae tinue. Nuca jasa tie tinue.

²⁹Junni Marta tsantinunsiri, Maríari wewe manwiruito Jesúchica jae.

³⁰Jesuri jun pueblobi cawica itominhe. Marta tulainuntenan cawiruraminhe.

³¹Junni weyan israelítalari Maríabe peaconpanaibi jaca jominlanue. Junni yala jaca junla quiralaquinue María wewe wiruito, urachi loto jinaminca. Junto menaranun postote warebi jinhinaeque tenhito, yalanan benechi pejinaminlanue.

³²Junni Maríari Jesúchibi fasi, yaca quirato, yachi nedele telenhito, Miya tie. Nu inte ramanpari, chiquilachi cayan puyano itomin jonhoe tie.

³³Maríabe yabe pejaminlabe duque warenaminlae. Junni Jesús yalaca yachi tencabi duque laquiinue.

³⁴Junto itsantie: —¿Puyacaca tile menalaquiyun? tie. Junni ya Maríabe Mártaberi Miya, quirabi pejilaisa! tilatie.

³⁵Junni Jesunan junca jera quirato, waree.

³⁶Junni Jesús warenaminca quirato, israelítalari itsanlatie: —Quiralaquede! latie. Lázaro puyacaca duque laquiraminue latie.

³⁷Aman junca quirato, weyanla itsanlatie: —Jesús quirano podeitonlaca quirasa carimin jotori, ¿niyaito Lázaro quiyanpunca manseno podeitu junhun? latie.

³⁸Junni Jesuri menaranun postobi fenato, manan duque laquiie. Junni puyacalaca menanun forote suchi doca jominca

³⁹suca junte nechi manlasilaquede! tie. Junni ya puyacachi soqui, ya Mártari, jun fiquica meráto, wepanato, itsantie: —Miya tie. Ya puyanun junpalu ma joe tie. Suca lasinari, peten puba jochunae tie.

⁴⁰Junni Jesuri itsantie: —¿La pacaca quereitori, Diosi wepanato quirantsancari quinaminca quirachunae tituan? tie.

⁴¹Junni Jesús tsantinunbi, puyacaca menaranun forote nechi suca manlasilaquee. Junni Jesuri jamochi quirato itsantie: —Apa, nuri laca meránun tenchi la acradeseiyoe tie.

⁴²Mirayoe nu laca numasitiya merámin joeque. Tsan josanan inte labe pewiruraminla yape meralaquisa tsantinayoe tie. Yape nu laca ereca joeque quereilaisa tsantinayoe tie.

⁴³Junni Jesús tsantitobi, sonba pato, itsanque otie: —Lázaro, manlade! tie.

⁴⁴Tsantinunsile ya Lázaro puyaca jomin forochi nechi manlaniie. Tedebinan, nedebinan piraca jun manlae. Caforobinan panuchi lapicaricala jominue. Junni manlanunsile Jesús yaca piraca jominca manwolelaquede! tie yape manjino podeisa.

⁴⁵Junni duque israelítalari Maríabe pejato, yachi cayanca mansoncarinaminca quirato, Jesube cayailainue.

⁴⁶Junto weyan israelítalari fariséolachica jito, fariséolabe jera cuenta quilaquinue Jesús niyantiya quica jonunca.

⁴⁷Junni fariséola junca meráto, yalabe mantá tan patelelabe layaito weyan mantaminlacanan jacarito, tenpalaquinue. Yala tenpanato, itsanlatinue: —¿Niyan quicaichunan? Ya tsachiri duque wepanato quirantsancari quinae latinue.

⁴⁸Yaca tsantin nenasa quiranilaquinari, jerale tsachila ya Jesúcari Miya joe tito, yabesiri cayailaichunae latinue. Tsanhilainari, romano soldadolari jato, Jesuca miya suwachique tsanlainae tito, chiquilaca pa jolajochunae latinue. Junto Diosichi yaca araleto, chiquilacanan quera quito, jera totelaquichunae latinue.

⁴⁹Junni israelita mantaminla tsanque tenpalaquinato, Caifaman panue. Jun watate Caifás yala tala fe mantá tan patele jominue. Junto ya itsantinue: —Nulari tenca iton tala tenpalaquinae tinue.

⁵⁰Jeralela tenca calaquede! Puyantsan jotori, mancasiri puyano fe se jochunae tinue. Manca tsachisiri piyanle israelítalachi tenchi puyantsan joe yape jeralela puyano itolajosa. Tsanque chiquilachi tenchi fe se jono joe tinue.