San Juan 11:24-50

²⁴Hane na Marta ne, cuitjin cachja na: ―‍Hvë ta cuya nima xingueen cjuahñu hya xi hacuaha yëjë nima cuya cjuahñu, nixtin xi tsichuva Nina sa nima sa xuta. ―‍Cuatjin cachja na.

²⁵Ngajan xi Jesús ne, cuitjin cachja me cojo rë na: ―‍Ngahan xi suá cjuahñu hacuaha tsicúya nima cjuahñu. Xuta xi mangucacun me cojo ná ne, ha ndasa cueya me ne, peru cuya me cjuahñu.

²⁶Hane yëjë xuta xi tjin rë me cjuahñu xatsë hacuaha mangucacun me cojo ná ne, hatuxa tsajin nu tsajin nixtin xi cjue hasen rë me xcun cjuañihi. ¿Há macjain nuju cjua vëhë? ―‍Cuatjin cachja Jesús.

²⁷Ngajan xi na vëhë ne, cuitjin cafayangui na: ―‍Juun, macjain ná, Tatá. Macjain ná xi ngayun xi catsingatju nuju Nina, ngayun xi Quihndi rë Nina ngayun. Hacuaha ngayun xi jemu cavinechinyin nuju xi cuinduvun ngasunhndë. ―‍Cuatjin cafayangui na Marta.

²⁸Xi cafë cachja na Marta cuatjin ne, sehe cavuya na quiji jaha na na María tíchja na. Hane xi cafehe na jan ne, sehe cajindayahma na na María, cuitjin cachja na: ―‍Cafehe maestru, hane jindaya me ngaye. ―‍Cuatjin cachja na.

²⁹Xi tu cahndë na María cjua vëhë ne, marcu macjain cavisatjen na quiji tjengui na Jesús.

³⁰Quihndë ne, cjëë sa cuisehen Jesús nandya ta secun cuaha me cahndë́ hiscan cavechútaha na Marta me.

³¹Hane xuta xi siu cojo na María ndava na xi tisua me na cjuetacun ne, xi cavëë me xi marcu macjain cavisatjen na quiji na ne, quiji tjengui me na. Xi má rë me ne, xcun tsjun cjui na, cojo sa xi ngajan squihnda na.

³²Hane xi cafehe na María hiscan secun Jesús ne, xi cavëë na me ne, quiji caticjaxcun na xcun me, sehe cachja na cuitjin: ―‍Tatá, sa xi ngayun nechun nguehe ne, cahmii nima xingueen. ―‍Cuatjin cachja na.

³³Hane xi cavëë Jesús xi cuatjin jihnda na hacuaha jihnda yëjë xuta xi ticojo na jan ne, camandya cacun me, jemu choho camahani camá rë xahasen rë me.

³⁴Hane cuitjin cavinenguise me: ―‍¿Jani tacun tsjun xi caveyun nima? ―‍Cuatjin cavinenguise me. Hane xuta jan ne, cuitjin cafayangui me: ―‍Tatá, nduvun chutsujun. ―‍Cuatjin cafayangui me.

³⁵Hane cajihnda Jesús.

³⁶Ngajan xi xuta jan ne, cuitjin cachja me ngajñi rë me: ―‍Chutsujun ni hacutjin catsihmu cacun me nima. ―‍Cuatjin cachja me.

³⁷Peru ngujo me ne, cuitjin cachja me: ―‍Me vihi xi casahmi me xi camandaja tuxcun cha rcá jan ne, ¿há camaji casahmi me xi cahmii nima vëhë? ―‍Cuatjin cachja ngujo xuta jan.

³⁸Ngajan xi Jesús ne, ngu ndiya nga jemu camandya cacun me. Sehe quiji me xcun tsjun. Tsjun jan ne, ngu nguijo, hane tingotjo rë ne, titsa ngu ndyojo.

³⁹Ngajan xi Jesús ne, cuitjin cachja me: ―‍Chjuhunxun ndyojo vë. ―‍Cuatjin cachja me. Ngajan xi na Marta, tíchja nima ne, cuitjin cachja na: ―‍Tatá, ha choho jne vë ta, ha tjin rë ñuju nixtin. ―‍Cuatjin cachja na.

⁴⁰Hane Jesús ne, cuitjin cachja me cojo rë na: ―‍Ha cachjá cojo nuju ta sa xi cumacjain nuju cjua naha ne, ngayun ne, chutsujun hacutjin jyë hnga Nina cojo Hasen rë me. ―‍Cuatjin cachja Jesús.

⁴¹Hya xi camá ne, cachjaháxin rë ndyojo jan. Hane hora vëhë cavutsejenniji Jesús ngahnga, sehe cachja me cuitjin: ―‍Ngayun Nahmi naha, suá nacuechji nuju ta canihñucuendun cjua xi cachjá cojo nuju.

⁴²Hacuaha ha hvë ta ngayun ne, hatuxa nihñucuendun cjua naha. Vëhë xi hacuiin ngujyë xi cuichjá cojo nuju cjua vihi, peru ngatsë rë xuta xi hinchacunndee vi ne, vëhë xi cuitjin tichjá, cojo sa xi cumacjain rë me xi ngayun caningatjun ná. ―‍Cuatjin cachja Jesús.

⁴³Hane xi cajnetaha cachja me cuatjin ne, sehe ña cajindaya me cachja me cuitjin: ―‍¡Lázaro, tetjun! ―‍Cuatjin cachja me.

⁴⁴Hya xi camá ne, cavetju Lázaro tsëhë tsjun jan, tjinguiya tsjian ntsacu me, tjinguiya tsjian tsja me, hacuaha tjihñu xcun me cojo ngu pañutu. Hane Jesús ne, cuitjin cachja me cojo xuta jan: ―‍Chundecjun tsjian vë sehe cumandaya me. ―‍Cuatjin cachja Jesús.

⁴⁵Quihndë ne, jemu cjín xuta quiji cavusehenya rë na María hacuaha cavëë me hacutjin casahmi Jesús. Hane xuta xi cuacun jan ne, camangu cacun me cojo Jesús.

⁴⁶Peru ngujo xuta ne, quiji cachja me cojo cha fariseo hacutjin casahmi Jesús.

⁴⁷Ngajan xi yëjë nahmi xi matitjun cojo cha fariseo xi cuacun jan ne, casahmi me ngu junta. Hane xcun junta jan ne, cuitjin cachja me: ―‍¿Mé ndatjin nihña? ta cha xi cuajyihi vë ne, jemu tisahmi cha cjuarcun.

⁴⁸Sa xi tsajin mé xi nihña ne, yëjë xuta ne, cumangu cacun me cojo cha. Hane vëhë xi xutaxa rë Roma ne, cuma cjan rë me, hane cjuahatahá me yungun xi matitjun naja hacuaha cjuahatahá me gubiernu xi tinihña. ―‍Cuatjin cachja me xi cuacun jan.

⁴⁹Peru ngu me xi cuacun jan xi hmí rë Caifás, me xi hacuaha má nahmi xi matitjun tsëhë yëjë nahmi nu vëhë ne, cachja me cuitjin: ―‍Ngayun ne, hyúun camahani.

⁵⁰Vijnii rcun xi ndaja tsujun xi ngu xihin ni cueya ngatsë rë yëjë ni xuta, hane hacuiin yëjë xuta cueya me. ―‍Cuatjin cachja Caifás.