Juan 11:24-50

²⁴Minikagi si Marta, “Netegahan ko te meantay sikandin te temanan aldaw aw entayen te Timanem se kedita te otaw lekat te nematay.”

²⁵Minikagi si Jesus, “Siaken se meg-antay te otaw lekat te nematay. Siak se egpemegay te kaling pedowan. Pengkey matay se otaw nemenal kanak, meneng meantay sikandin.

²⁶Aw memenal kanak se otaw wedà pa kematay, eked palos sikandin detengi te kemetayun. Nemenal ka lay kenyan?”

²⁷Timaba si Marta, “Ee, Pengolo. Nemenal a te sikona se Batà te Timanem. Sikona se Misiyas insogò din dini te keneyonan.”

²⁸Penga te peg-ikagi i Marta kenyan, minolì sikandin amon mangay te adi din si Maria. Minikagi sikandin te wedad doma otaw dimineg, “Dimateng den se Menenoladà, aw impeangay ka din.”

²⁹Pegdineg i Maria kenyan, ayas timindeg aw dimoton kandin.

³⁰Wedà pa dateng si Jesus te lonsod, so kidoen pa sikandin te sinongonan i Marta kandin.

³¹Na, se menge Judiyo migsinalay kandin kidoen te balay, pegkità dan te pegkesayo i Maria lekat te balay, timaking dan kandin, so eden dan aw domoton te lebeng amon megkelag.

³²Meneng pegdateng i Maria doton ki Jesus, limongken sikandin, aw minikagi, “Pengolo, simpana dini ka, eked peden kematay se kedowa ko.”

³³Sagwa kimità si Jesus te migkelag si Maria aw kedita te Judiyo timaking kandin, neantag se pedowan din aw ontò nelidò.

³⁴Minikagi sikandin, “Kenan lay lebengi?” Minikagi dan, “Pengolo, taking ka kenami.”

³⁵Penga niyan, migkelag heman si Jesus.

³⁶Pegkità te menge Judiyo te migkelag sikandin, minikagi dan, “Ontò kedì dakel se pedowan din diyà te nematay.”

³⁷Meneng minikagi se menge doma, “Sikandin se migpegolì te mata te otaw bota. Simpana dini sikandin, wedà peden kematay si Lazaro.”

³⁸Pegdateng i Jesus doton te lebeng, todà neantag se pedowan din. Ilib se linebengan ki Lazaro, aw doen dakel bato insampeng diyà te awang niyan.

³⁹Minikagi si Jesus, “Owangi niyo se lebeng din.” Meneng minikagi se etebay te nematay si Marta, “Pengolo, nemahò den, so epat pa se aldaw lekat te peglebeng kandin.”

⁴⁰Minikagi si Jesus, “Eneng-enengi se inikagi ko diyà kamno. Aw memenal ka kanak, komità ka te melangkaw se Timanem.”

⁴¹Penga niyan, inabat dan se bato insampeng te lebeng. Limengag si Jesus aw migtawal-tawal, “Amà, egpesiontong a te dinineg no den se pinemoyò ko kamno.

⁴²Netegahan ko te gayed a no egpenenelanen. Meneng migtawal-tawal a den kamno seini amon ketebangan se menge doma otaw dini, so ibeg ko memenal dan te sikona se simogò kanak dini te tanà.”

⁴³Penga te pegtawal-tawal i Jesus, timawal sikandin te dakel se kagi din, “Lazaro, lowà ka den kidoen.”

⁴⁴Limowà si Lazaro neantay den lekat te nematay. Ginakes pa se kedakel te lawa din te sapot pengkey diyà te benis din aw bebenayun. Doen kelobaw imbagkes diyà te bawa din. Minikagi si Jesus, “Lebadi niyo sikandin amon mekeipanaw.”

⁴⁵Se medita Judiyo timaking ki Maria doton te lebeng, pegkità dan te kepelahan ininang i Jesus, nemenal dan kandin.

⁴⁶Meneng doen menge doma dan Judiyo dimoton te menge Parisiyo, aw mig-indan dan kandan te ininang i Jesus.

⁴⁷Pegdineg te menge pengolo te simbahan aw Parisiyo, migtipon dan te kedita te doma dan obanen te simbahan, aw minikagi dan, “Megmeno kidon? So medita se kepelahan eg-inangen te otaw sìyan.

⁴⁸Aw eked kidon pegsagda kandin, kedita te Judiyo memenal eleg kandin. Aw domineg se gobirno kidoen te Roma te doen sebad otaw megpeinang selotan amon lomowan dini, medaet iyan, so isogò dan dini se menge sondalo amon pegbàtan dan se ogpeanan tadon, aw imetayan dan heman se kedita tadon Judiyo.”

⁴⁹Meneng doen sebad otaw diyà kandan si Caifas. Sikandin se ininang ontò pengolo te simbahan dalem te omay sìyan. Minikagi sikandin, “Kolang se aneng-aneng niyo.

⁵⁰Wedà niyo besi eneng-enengi te mèpiya aw sebad olò se otaw matay iselilin te kedita te otaw. Labi pa mèpiya aw sikandin se imetayan amon eked imetayi se kedita tadon Judiyo.”