John 7:40-51

⁴⁰Hunu gau i lodo digau dogologowaahee aanei, gu longono a Mee ne helekai beenei. Digaula ga helekai, “Taane deenei la soukohp donu.”

⁴¹Hunu gau e helekai, “Mee go di Mesaia.” Gei hunu gau e helekai, “Di Mesaia la hagalee hanimoi i Galilee.

⁴²Di Beebaa Dabu e helekai bolo di Mesaia le e gila mai i di madawaawa o King David, e haanau mai i Bethlehem di waahale a David.”

⁴³Digau dogologowaahee aalaa guu noho hagabuulinga dagidahi i di gili o Jesus.

⁴⁴Hunu gau bolo ginaadou e kumi a Mee, ge tangada ne bili gi Mee ai.

⁴⁵Digau hagaloohi gaa hula gi muli, gei nia dagi hai mee dabu, mo nia Pharisee ga heeu, “Goodou e aha digi laha mai a Mee?”

⁴⁶Nia gau hagaloohi ga helekai, “Ma deai tangada e helehelekai be Tangada deenei ai!”

⁴⁷Gei nia Pharisee ga helekai, “Mee gu halahalau goodou labelaa?

⁴⁸Goodou gu iloo be di maa tangada aamua be di Pharisee i golo gu hagadonu a Mee?

⁴⁹Digau dogologowaahee aanei e de iloo nia haganoho Moses, gaa hidi ai digaula gaa noho i lala di hagahalauwa a God!”

⁵⁰Di Pharisee e dahi, go Nicodemus, taane dela ne hana ga heetugi gi Jesus i mua, ga helekai gi digaula,

⁵¹“Di tonu o tadau haganoho le e hai bolo gidaadou e deemee di haga huaidu nia daangada i mua di iloo di mee dela ne hai.”