John 4:39-53

³⁹Plenty people ob Samaria dey een dat town bleebe pon Jedus cause de ooman say, “E tell me ebryting A done done.”

⁴⁰So wen de people ob Samaria come ta Jedus, dey beg um fa stay wid um. An e stay dey two day.

⁴¹Cause e taak ta de people dey, a heap mo ob um come fa bleebe pon Jedus.

⁴²Den dey tell de ooman say, “We bleebe now. Dis time yah, e ain jes cause ob wa ya been tell we. We bleebe now cause wesef done yeh um. An we know dat e de Sabior ob de wol, fa true.”

⁴³Wen Jedus done spen de two day dey een Samaria, e gone ta Galilee.

⁴⁴Jedus esef been say, “A prophet ain got no hona dey een e own country.”

⁴⁵De people een Galilee done been ta Jerusalem ta de Passoba Feas, an dey been see ebryting e beena do jurin dat time dey. So wen Jedus git ta Galilee, de people dey gim haaty welcome.

⁴⁶Jedus gone back gin ta Cana een Galilee, de same place weh e ton de wata eenta wine. One gobment offisa been dey een Cana, an e hab a son wa been sick een Capernaum.

⁴⁷Wen de offisa yeh say dat Jedus been come fom Judea ta Galilee, e gone ta Jedus an e beg um fa come ta Capernaum fa heal e sick son, wa mos dead.

⁴⁸Jedus say, “Ain none ob oona neba gwine bleebe dout oona see me da do miracle an oda great ting.”

⁴⁹De offisa say, “Please sah, come long wid me now, fo me son dead.”

⁵⁰Jedus tell um say, “Ya kin go. Ya son gwine lib!” De man bleebe wa Jedus tell um, an e gone pon e way.

⁵¹Wiles e beena gwine ta e house, e saabant dem meet um an tell um de nyews say, “Ya boy gwine lib!”

⁵²De offisa aks e saabant dem wa time e been wen e son staat fa git betta. Dey tell um say, “E been one o’clock yestiddy atta noon wen de feba broke an lef um.”

⁵³Den de fada memba, dat been de same time wen Jedus been tell um say, “Ya son gwine lib!” So de offisa an all de people een e house, dey bleebe pon Jedus.