SAN JUAN 4:39-53

³⁹Xeyay nipilan monaw tiül aaga cambaj tiül iüt Samaria tayariw andeac Teat Jesús wüx tanguiayiw andeac aaga najtaj, cos tapiüng: “Tasaj xic meáwan leaw lanarang”, maw.

⁴⁰Wüx tapeayiw quiaj monaw tiül aaga cambaj quiaj, tapots masajüw Teat Jesús macül quiaj maquiüjpüw. Quiaj tacül quiaj ic nüt.

⁴¹Xeyay nipilan tayariw nej andeac wüx tanguiayiw nejay Teat Jesús tenguial aquiaach.

⁴²Condom tasajüw a najtaj: ―Nganüy mbich lanayariün andeac nej cos nejay tanguiayasan andeac, ngome áagan leaw tesaj xicon wüx nej. Nganüy sajawan naleaing nej aaga Cristo leaw lapiürang aliüc mawün wüx asoet nipilan meáwan wüx iüt ―ajüw nej.

⁴³Wüx tamong ic nüt quiaj, Teat Jesús taw Samaria, tamb andüy Galilea.

⁴⁴Masey nejay Teat Jesús tandeac nguineay nop nendeac andeac Teat Dios ngome andiüram tiül miíüt nej, nganüy nej apmandilil mandüy quiaj alinomb.

⁴⁵Wüx tapeay tiül Galilea, apac omeajtsüw majawüw nej monaw quiaj, cos nejiw laiünüw Jerusalén aton majawüw nangos nüt pascua. Tajawüw quiaj meáwan leaw nej tarang wüx nangos nüt.

⁴⁶Condom Teat Jesús tandilil alinomb andüy cambaj Caná tiül Galilea, niüng ninguinüt tangowüüch yow marang vin. Ajlüy tiül cambaj Capernaum nop natang nenajiüt ocueaj cambaj, xeyay iün andeow micual nej.

⁴⁷Aaga naxey quiaj wüx tanguiay Teat Jesús lapeay Galilea imiün Judea, tamb matüch quiaj majaw. Tapots matün ocueaj Teat Jesús mamb aniüng nej mamongoch iün andeow micual nej, cos laxeyay, laliüc mandeow.

⁴⁸Quiaj tasaj nej Teat Jesús: ―Icona sitiül ngo mejawan ateócan ngome apmeyariün sandeac ―aj.

⁴⁹Naleaing aaga nenajiüt xeyay tatün ocueaj Teat Jesús, tasaj: ―Teat, ich majmiüc imal imeaats, tabar wǘxan nganaw mandeow xecual ―aj nej.

⁵⁰Condom quiaj tasaj nej Teat Jesús: ―Quiür ijtsor, micual lajneaj ―aj. Aaga naxey tayar andeac Teat Jesús, quiaj tajtsor.

⁵¹Wüx laámb apmapeay aniüng nej, tambüw mangochiw nej mimos nej, tapiüngüw: ―Micual lajneaj ―ajüw nej.

⁵²Condom quiaj tatün manguiay nejiw cuame ores tajneaj micual nej. Quiaj tapiüngüw: ―Tim lanchejliow nüt tacueat müüch nej nerraar, quiaj tajneaj ―awüw.

⁵³Quiaj leaad omeaats aaga naxey, naleaing aaga ores wüx tasaj nej Teat Jesús: “Micual lajneaj”, maj nej. Quiaj aaga naxey tayar andeac Teat Jesús maquiiüb meáwan leaw alaniüng nej.