John 2:18-25

¹⁸Me sul piyu Israel ngak ngar fithed bbugithin ngak ni lungurad, “Mang maang’ang e rayag ni ngam ngongliy ngam dag riy ngomad ni bay mat’wum ni ngam rin’ e ren’ey ni kam rin’?”

¹⁹Me fulweg Jesus ngorad ni ga’ar, “Mbuthuged e re naun rok Got ney mu gu toy u lan dalip e rran nge m’ay.”

²⁰Miyad fith ngak ni lungurad, “Ngkum toy u lan dalip e rran nge m’ay? Re Tempel ney e aningeg i ragag nge nel’ e duw ntoy mfini m’ay!”

²¹Machane re Tempel ni ba’aram ni be weliy Jesus murung’agen e aram downgin.

²²Ma nap’an ni faseg Got Jesus ko yam’, ma aram me yib ngan’ pi gachalpen e re bugithin ney ni yog Jesus; ma aram me mich u wun’rad e thin ni bay u lan e babyor nib thothup nge thin ni i weliy Jesus.

²³Nap’an ni bay Jesus u lan e binaw nu Jerusalem ko madnom ni Paluk’af, ma bo’or e girdi’ ni mich Jesus u wun’rad nnap’an nra guyed e pi maang’ang ni ngongliy.

²⁴Machane de pagan’ Jesus ngorad, ya manang fan laniyan’ e girdi’ ni gubin.

²⁵Ma dariyfan ni nge weliy be’ murung’agen e girdi’ ngak Jesus, ya ri manang Jesus e n’en ni be leamnag e girdi’.