Johannes 9:28-41

²⁸Iwe, ra eäni kapas turunufas ngeni o üreni, “En nöün enan mwän chon kaiö, nge äm nöün Moses chon kaiö.

²⁹Äm aia silei pwe Kot a kapas ngeni Moses me lom, nge enan mwän äm aise fen mwo nge silei ia a feito me ie.”

³⁰Ewe mwän a pölüeniir, “Mwa met me amairün ei mettoch! Ämi ousap silei ia a feito me ie, nge i a aneneloi mesei.

³¹Kich sia silei pwe Kot esap aüseling ngeni än ekewe chon tipis tüngor, nge a aüseling ngeni eman mi meniniti i o föri letipan.

³²Seni lepoputän fanüfan, esap wor eman a aneneloi mesen eman aramas mi upuchun.

³³Ika pwe ei mwän mi aneneloi mesei esap feito seni Kot, esap tongeni föri och mettoch.”

³⁴Iwe, ra üreni, “En ka uputiu lon tipis o märitä lon tipis, pwota ka ekiekin afalafalakem?” Iwe, ra atowu ewe mwän seni ewe imwen felikis.

³⁵Iwe, Jesus a rong pwe ra atowu ewe mwän seni ar we imwen felikis. Lupwen a küna i, a aisini, “Ifa usun, ka lükü ewe Nöün Kot?”

³⁶Ewe mwän a pölüeni, “Ai samol, iö ätewe, kopwe aiti ngeniei, pwe ngang üpwe tongeni lükü i.”

³⁷Jesus a üreni, “Ka fen küna i, ina i ätewe mi kapas ngonuk.”

³⁸Mürin ewe mwän a apasa, “Ai Samol, üa lükü!” Iwe, a fotopwäsuketiu mwan o fel ngeni.

³⁹Iwe, Jesus a üreni, “Üa feito lon fanüfan pwe üpwe eäni apwüng, pwe chokewe mi chun repwe küna mwer, nge chokewe mi küna mwer repwe chun.”

⁴⁰Iwe, ekoch Farisi mi nom ren ra rongorong met a apasa o ra aisini, “Met, äm aia pwal chun?”

⁴¹Jesus a pölüeniir, “Are ämi oupwe chun, esap wor ämi tipis. Nge iei ämi oua apasa pwe oua tongeni küna mwemi, iei popun ämi tipis a chök nonom womi.”