Jon 9:28-41

²⁸Tama augwaligo aga dali dwai nogi posobo po weyu, te po wai, “Nage da, aga wali pabo bidi dao. Tialima, da te polobadu bidai nogi yai bidi Moses wali pabo bidi dabe dao.

²⁹Dago koneai, God agai po Mosesbolo mawai. Tialima, u bidi menade pedalaiwe, te dago konebeo,” augwaligo te po wai.

³⁰Te gedu widai bidigo te Juda bagego tobolu bidi dabebolo te po wai, “Te bidi noma sabo sę yali bidi dao. Aga menadu asaliwe, te dagego konesiąwai goli, agai eno gedu si dwagi yai ilali.

³¹Dago koneai, Godigo te dwai sę ebo bagego hanalu wabo po odobo menio. Tialima, bidi me deligo agai Godide wi eyu, Godigo po odoyu, Godigo homu wali pabo bidi, te bidigo hanalu wabo po Godigo odobo dao.

³²Tigidali sogo polobadu bidi me deli aga idago gedu widai ame nani po dago odai. Tiali digi bidi me deligo te gedu pedalali po dago munu me odai menio. Dago wąį mu, augwaligo te tobage po odai menio, dago ayago me, tama megi dago me odai menio.

³³Godigo te bidi tagala paligi menigi da, teda agai eno gedu dwagi yai iligi menio,” te polobadu gedu widai bidigo te po wai.

³⁴Augwaligo te gedu widai bidibolo te po wai, “Nage ame neyu, nage dwai sę dali bidai. Nage dwai sęgęde bidai bidi mu da, nage. Tama tiali goli, magi baso nago da ola mawainogo ebawe?” augwaligo te po wai. Te po olama, augwaligo te polobadu gedu widai bidi te augwaligo bomo yai po ola mabo be tomoba asidali weyu, habu selali.

³⁵Te bidi Jisas agai te Juda bagego te polobadu gedu widai bidi habu selali po odai. Agai te bidi gegelama, sulama, te po wai, “Nago te Godigo Bidi Mude naga homu dąų olama, mubawe?” Jisasgo te po wai.

³⁶Te bidigo te po wai, “Genuai Bidi, te Godigo Bidi Mu te de dawe? Nago enabolo wao, agabolo eno homu muainogo yaibao.”

³⁷Jisasgo agabolo te po wai, “Nago aga suai. Te megi nage dali po wabo bidi tama dao,” Jisasgo te bidi dali te po wai.

³⁸Tama te bidigo kidu tǫba sugunama, Jisasbolo te po wai, “Genuai Bidi, eno nagebolo homu dąų olama, mubao,” te bidigo te po wai.

³⁹Jisasgo te po wai, “Ena e tǫba asali, tǫde bidibo we bidi dagalai hagede asai. Te homu kolesaga tomode gedu halua sai bidi, gedugo ma sumainogo te ena asai. Me ma, we bidi meba augwaligo homu, ‘Ao, dago koneai dao, te da te gedugo subo bage dao,’ augwaligo te homu ebo dao. Tama tibaso, augwaligo Godigo homu koneidali weyu augwali gedu halua somainogo ena asai dao,” Jisasgo te po wai.

⁴⁰Te Farisi bage me badu augwali Jisas dali tede bidai. Tama augwaligo te po odai. Augwaligo Jisasbolo te po wai, “Da me homu kolesaga tomode gedu halua sai dawe, nago te po obawe?”

⁴¹Jisasgo po wei ponoyu, te po wai, “Dagego te homu eyu, ‘Ao, da te homu kolesaga tomode gedu halua sai bage dao,’ te dagego te homu eyu, tama dagego eno po sela sągi menigi da, teda dage dwai sęgę menigi da. Tialima, dagego duga gedu ula elalubao po waligo da, teda dagego sęgę me elalubao,” te po wai.