San Juan 9:28-41

²⁸Yet yalni naj hacaꞌ tuꞌ, istzabnico ebnaj isbahni naj, yalni ebnaj tet naj: —Hach tiꞌ, ayachxaco yinta naj, wal han̈on̈tiꞌan̈ yinta iscuybanil naj Moisés tzujanon̈an̈.

²⁹Walon̈tiꞌan̈ caw johtajan̈ tato haꞌ caw Comam Dios anicano cuybanile tet naj Moisés tuꞌ. Wal naj chawal tiꞌ, caw mach johtajojan̈ baytuꞌwal titnaco naj, ẍi ebnaj.

³⁰Istakꞌwican̈ naj tet ebnaj xin: —Caw chicꞌay incꞌulan yuto cheyala tato mach heyohtajo bay titnaco yaꞌ, yajaꞌ caw cheyila hajlo insatan yu yaꞌ.

³¹Caw johtaj tato mach chabe Comam Dios tzet chiskꞌan anma mulum, hachcachann̈e anma caw ayco yanma yin̈ Comam, cat yinayo isba tet, hachcachann̈e huntekꞌan anma tuꞌ chakꞌ Comam ispaj tzet chiskꞌanaꞌ.

³²Wal xin, caw maẍto bay chijabe iskꞌumal tato ay huno mac chiyu yakꞌni hajloho sat hunu anma maẍticꞌa chiyu yilni yettaxticꞌa ispitzcꞌahi.

³³Tato maẍtaj Comam Dios an̈eti yaꞌ tiꞌ, caw machim nino tzet chiyu iswatxꞌen yaꞌ, ẍi naj tet ebnaj.

³⁴Istakꞌwi ebnaj tet naj: —Walach hach tiꞌ, caw mulumach yettaxticꞌa hapitzcꞌahi. ¿Tom chaẍoc con̈hacuyuꞌan̈ hawalni? ẍi ebnaj tet naj, hac tuꞌ yu istennilti ebnaj naj tuꞌ yul capilla.

³⁵Yabe Comam Jesús tato tenlaxilti naj hajlo sat tuꞌ yul capilla, haxa yet ischahloyo naj yu Comam, yalni Comam tet naj hacaꞌ tiꞌ: —¿Chimhawayto yul hawanma yin̈ Hanin Akꞌbilintijan texol yu Comam Dios? ẍi Comam tet naj.

³⁶Iskꞌamben naj tet Comam: —Mamin, ¿mac huneꞌ chawal tuꞌ? Hal wetan cat xin wanico wanmahan yin̈, ẍi naj.

³⁷Yalni Comam tet naj: —Caw xahawil yin̈; Hanintonan huneꞌ mac bay lan̈an hatzotel tiꞌ, ẍi Comam tet naj.

³⁸Yet yaben naj hacaꞌ tuꞌ, yay jahno naj yin̈ sat Comam, yalni naj: —Caw chiwaco wanmahan tawin̈ Mam, ẍi naj.

³⁹Yalni Comam tet naj: —Wal hanintiꞌan, hulnajinan bey yul sat yiban̈kꞌinal tiꞌ yun̈e wilnihan tzettaj chiꞌelico anma, yuto ay anma tiꞌ caw mach chiyu yilni, yaj xin haninan chiwakꞌ hajlohojan sat. Aypaxo anma caw cꞌul yilni, yaj chimutzꞌicano sat wuhan yun̈e matxa chiyu yilni, ẍi Comam.

⁴⁰Ay xin huntekꞌan ebnaj fariseo ayco iscꞌatan̈ Comam, yet yaben ebnaj yin̈ tzet yal Comam tuꞌ, yalni ebnaj: —¿Tom xin haꞌ hunon̈an̈ mach chiyu jilnihan̈ hawalni? ẍi ebnaj.

⁴¹Istakꞌwi Comam tet ebnaj: —Kꞌinalo tato mach chiyu heyilni tzettaj ye tuꞌ yet Comam Dios yehi, caw machim hemul. Yaj cheyala tato caw chiyu heyilni tzettaj ye tuꞌ yet Comam Dios, yaj mach cheyijepaxoj, yuxinto caw ay hemul, ẍi Comam tet ebnaj.