Jone 9:28-41

²⁸Dokopa dokaitame pii koo lao yanu pyao, “Emba baanya disaipele. Dopaka doko, naima Mosesenya disaipele.

²⁹Goteme Mosese pii lamaiyamo dupa naimame masilyamano. Dopaka doko, akali dake anja tangepe naima masala naelyamanona,” leami-pyaa.

³⁰Baame yanu pyao dokaita lamaiyoo, “Baame nambanya lenge tasakalamoaka doko, nyakamame baa anja tangepe lao masala naelyamino dokonya nambanya mona andelyamo.

³¹Goteme endakali koo pingi dupanya pii nasakamaingi. Dopaka doko, Gote minao katao baanya masingili pingi endakali dupanya baame pii sakamaingi doko naimame masilyamano.

³²Wamba wambapi akali mende endangimi lenge monda jetae mandelyamo doko dee akali mendeme lenge tasiana lapae pii mende nasilyamo.

³³Goteme akali dake epena naleali kandao doko, baame kapa pao opale mende napipyalina,” lea-pyaa.

³⁴Dokaitame yanu pyao baa lamaiyoo, “Emba koo sepeta mandipae etete koo dokome naima mana leepe?” latala baa Jutamanya losuu anda dokonya watao piami-pyaa.

³⁵Jisasame akali doko watao pyalamino lapae doko sia. Sepala baame akali doko kutao pupala baa lamaiyoo, “Embame Endakalinya Ikiningi doko lao masoo minilipi?” lea.

³⁶Baame Jisasanya pii yanu pyakamaiyoo, “Akali Andake, Endakalinya Ikiningi doko apipi? Embame langitinopa, nambame masoo minatoana,” lea.

³⁷Dokopa Jisasame baa lamaiyoo, “Embame baa kandatalenona, epapu pii lao kalyambino dake baana,” lea.

³⁸Akali dokome lao pituu, “Kamongo, nambame masoo minilyona,” lea. Dopa latala baame luma lakapala Jisasa lao tama pia.

³⁹Dokopa Jisasame lao pituu, “Namba isa yuu dakenya epeo doko, endakali lenge monda dupa lenge tena lao lenge tengema dupa monda jina lao yapalanya epeona,” lea.

⁴⁰Jisasame dopa leamopa Patasi mendapua baa-pipa kateamino dupame sepala baa lamaiyoo, “Naima apataka lenge mondape?” leami.

⁴¹Dokopa Jisasame dokaita lamaiyoo, “Nyakama lenge monda pyali kandao doko, nyakama-kisa koo mende nasipyali. Dopaka doko, nyakama lenge telyamanona lalamino dokome nyakamanya koo dupa mee silyamona,” lea.