Yohanes 9:28-41

²⁸Ne den kosi en, dan den taigi en taki: “Yu na wan bakaman fu En, ma wi na bakaman fu Moses.

²⁹Un sabi tak' Gado ben taki nanga Moses. Ma un no sabi pe a man disi kmoto.”

³⁰Dan a man piki den taki: “Na wan ferwondru sani tak' A dresi mi ai, ma un no sabi pe A kmoto.

³¹Wi sabi tak' Gado no e arki sondusma. Ma A e arki den sma di e lespeki En èn di e du san A wani.

³²Noiti a psa ete tak' wan sma opo den ai fu wan sma di gebore breni.

³³Efu a man disi no ben kmoto fu Gado, A no bo man du noti.”

³⁴Den piki a man taki: “Yu gebore ini sondu, dan yu wani kon gi un leri?” Dan den yagi en gwe.

³⁵Yesus ben kisi fu yere tak' den yagi a man. So di A miti en, A aksi en taki: “Yu e bribi ini a Manpikin fu Libisma?”

³⁶A man piki taki: “Masra, taigi mi suma na En, fu mi kan go bribi ini En.”

³⁷Yesus piki en taki: “Yu si En kba. Na a Wan di e taki nanga yu.”

³⁸Ne a man taki: “Masra, mi e bribi.” Dan a anbegi En.

³⁹Dan Yesus taki: “Mi kon na grontapu fu koti a krutu disi: Brenisma o kon si èn den sma di e si, o kon breni.”

⁴⁰Wantu Fariseiman di ben drape nanga En, yere san A taki. Dan den aksi En taki: “Yu wani taigi un tak' un breni tu?”

⁴¹Yesus piki den taki: “Efu un ben breni, dan un no bo abi sondu. Ma fu di un taki tak' un e si, meki un no e kisi pardon fu un sondu.”