1A d'a jun tiempoal chi', a vin̈aj Merodac-baladán, sreyal Babilonia, yuninal vin̈aj Baladán, ix yab' vin̈ yalji to penaayaxnac vin̈aj Ezequías chi', palta b'oxnacxi sc'ol vin̈. Yuj chi' ix scheccot juntzan̈ eb' schecab' vin̈ yic tzul yac'ancan eb' tas ix tz'ib'ejcot vin̈ rey chi' yed' silab'.
2Ix te tzalaj vin̈aj Ezequías chi' yujto ix javi eb'. Ix sch'oxan masanil sb'eyumal vin̈ d'a eb', aton q'uen plata, q'uen oro, perfume, aceite te vach', b'aj molan masanil yamc'ab' yic oval yed' masanil tastac ay d'a yed'tal b'aj molb'ab'il. Man̈xa junoc tas ay d'a spalacio vin̈ yed' masanil tas ay d'a yol smacb'en vin̈ maj sch'ox d'a eb' vin̈.
3Axo yic ix paxcan eb' vin̈, ix in b'at a in Isaías in tic schecab' Dios vil vin̈aj rey Ezequías chi', ix in c'anb'an icha tic: —¿B'ajtil ix cot juntzan̈ eb' vin̈ vinac chi'? ¿Tas ix ul yal eb' vin̈ d'ayach? xin chi. Ix yalan vin̈ icha tic: —A d'a jun chon̈ab' te najat ix cot eb' vin̈, aton Babilonia, xchi vin̈.
4Ix in c'anb'anxi d'a vin̈: —¿Tas ix ul yil eb' vin̈ d'a a palacio tic? xin chi. Ix yalan vin̈ d'ayin: —Masanil tas ay d'a in palacio tic ix yil eb' vin̈, ix in ch'oxan masanil tastac molb'ab'il vuuj, xchi vin̈.
5Ix valan d'a vin̈ icha tic: —Ab' val tas syal Jehová Yajal d'a Smasanil:
6Ol c'och sc'ual, masanil tas ay d'a a palacio tic yed' jantac tas ix smolb'ejcan eb' a mam icham yed' ico', ol ic'chajb'at masanil d'a Babilonia chi'.
7An̈ejtona' eb' in̈tilal, ol ic'jocb'at eb' d'a Babilonia chi', ol ic'chajel sn̈olob' sq'ueen eb', ol ochcan eb' yac'umaloc servil vin̈ rey chi' d'a spalacio, xin chi.
8Ix yalan vin̈ icha tic: —A jun lolonel ix schec Jehová al tic d'ayin, te vach' yaji, xchi vin̈. Yujto ix sna vin̈ icha tic: Yacb'an pitzan in to, junc'olal caji, malaj tas ol in ic'anoc, xchi vin̈.
