Iosua 18:8-28

⁸Ma ra tarai dia.ga tut, ma dia ga vana; ma Iosua i ga vartuluai pire diat dia ga vana upi diat a tumu ra varvai ure ra gunan, ma i ga biti dari: Avat a vana, avat a valivute ra gunan, avat a tumu vake ra varvai ure, ma avat a talil mulai piragu, ma ina padapadailam ure avat ati Silo ta ra luaina mata i ra Luluai.

⁹Ma ra tarai dia ga vana ma dia ga valivute ra gunan, ma dia ga tumu vake ra varvai ure ra lavur pia na pal tana tai tika na buk, lavurua na tiniba tana, ma dia ga lilikun mulai tadav Iosua ta ra gunan Silo.

¹⁰Ma Iosua i ga padapadailam ure diat aro Silo ta ra luaina mata i ra Luluai; ma Iosua i ga tibe tar ra gunan ta ra tarai Israel abara, varogop ma kadia lavur tiniba.

¹¹Ma dia ga padapadailam pa ra tiniba kai ra tarai Beniamin varogop ma kadia lavur apik na tarai, ma di ga tibe diat ma ra langun livuan ta ra tarai Iuda ma ra tarai Iosep.

¹²Ma kadia langun ta ra papar a labur i ga tur pa ia ta ra Iordan. ma i tutua ta ra ul a luana maravai Ieriko ta ra papar a labur tana, ma i bolo ta ra gunan i lualuana upi ra matana taoai, ma ra mutuaina ra bil Bet-Aven.

¹³Ma ra langun i vana maro upi Lus tadav ra luana Lus (Betel nam), ma i mur ra matana taubar; ma ra langun i kuba tadav Atarot-Adar, i pakit ra luana i ki ta ra papar a taubar tai Bet-Koron nina i ki ara.

¹⁴Ma ra langun i vana likun ta ra papar a taoai ma i mur ra matana taubar, i tur pa ia ta ra luana i ki maravai Bet-Koron ma i vana upi ra papar a taubar; ma i tuk uro Kiriat-Baal (Kiriat-Iearim nam), a pia na pal kai ra tarai Iuda; go ia ra langun ta ra papar a taoai.

¹⁵Ma ra langun ta ra papar a taubar i tur pa ia aro iat ra mutuai ra langun Kiriat-Iearim, ma i mur ra matana taoai, ma i tuk tar ta ra mata na tava Neptoa;

¹⁶ma ra langun i kuba tuk tar ta ra mutuai ra luana i tur pire ra male kai natu i Inom, nina i ki ta ra male Repaim ta ra papar a labur; ma i vana ur ta ra male kai Inom ta ra papar a taubar ta ra luana kai ra tarai Iebus, ma i kuba tadav En-Rogel;

¹⁷ma i mur ra matana labur, ma i vana rikai pire En-Semes, ma i vana rikai Gelilot nina dir tur vartalai ma ra tututua Adumim; ma i vana ur tadav ra vat kai Boan natu i Ruben;

¹⁸ma i vana bolo upi ra papar a lualuana ta ra papar a labur ta ra male Araba, ma i kuba tadav ra male Araba;

¹⁹ma ra langun i bolo maravai Bet-Kogla ta ra papar a labur tana, ma ra langun i tuk tar ta ra tungunana ta ra papar a labur ta ra Ta Mat, ta ra tukuna Iordan ta ra papar a taubar; go ia ra langun ta ra papar a taubar.

²⁰Ma ra Iordan ia ra langun ta ra papar a taur. Go ia ra tiniba kai ra tarai Beniamin, ma ra langun kikil ia, varogop ma kadia lavur apik na tarai.

²¹Ma ra lavur pia na pal kai ra vuna tarai Beniamin varogop ma kadia lavur apik na tarai, go diat: Ieriko, Bet-Kogla, Emek-Kesis,

²²Bet-Araba, Semaraim, Betel,

²³Avim, Para, Opra,

²⁴Kepar-Amoni, Opni, ma Geba; a vinun ma a ura pia na pal ma kadia lavur gunan ik;

²⁵Gibeon, Rama, Berot,

²⁶Mispe, Kepira, Mosa,

²⁷Rekem, Irpel, Tarala,

²⁸Sela, Elep, Iebus (Ierusalem nam), Gibeat, ma Kiriat; a vinun ma a ivat na pia na pal ma kadia lavur gunan ik. Go ia ra tiniba kai ra tarai Beniamin varogop ma kadia lavur apik na tarai.