IOANE 4:21-52

²¹Iesu ia gwau, “Lauegu hereva oi abia dae: Gabeai nega ta do ia mai, inai ororo dekenai, bona Ierusalema dekenai danu, taunimanima be do idia tomadiho henia lasi.

²²Umui Samaria taudia ese dahaka umui tomadiho henia be umui diba lasi. Ai Iuda taudia ese dahaka ai tomadiho henia be ai diba. Badina Dirava ese taunimanima ia hamauria kara, be ai Iuda taudia dekena amo ia mai.

²³To nega ta do ia mai, bona harihari ia ginidae vadaeni, tomadiho taudia momokani ese mai Lauma bona mai momokani danu Tamana do idia tomadiho henia, badina be Tamana ese unai bamona idia tomadiho henia taudia ia tahua noho.

²⁴Dirava be Lauma, bona do idia tomadiho henia taudia ese, lauma bona momokani dekena amo do idia tomadiho henia.”

²⁵Hahine ia gwau, “Lau diba Mesia, Keriso idia gwauraia tauna, be do ia mai, bona do ia mai neganai, ia ese gau ibounai do ia gwauraia hedinarai.”

²⁶Iesu ia haere, ia gwau, “Tauna be lau inai, lau hereva noho oi dekenai.”

²⁷Unai neganai Iesu ena diba tahua taudia idia giroa mai, ia dekenai idia ginidae, vadaeni idia hoa, badina ia be hahine ta danu ia herevahereva. To ta ese ia nanadaia lasi, “Dahaka oi tahua?” o, “Dahaka dainai ia danu oi herevahereva?”

²⁸Vadaeni unai hahine be iena ranu utua gauna ia rakatania, hanua dekenai ia lao. Ia ese hanua taudia dekenai ia hamaoroa, ia gwau,

²⁹“Umui mai, tau ta umui itaia, egu kara ibounai ia ese ia gwauraia hedinarai. Dahaka umui gwau, ia be Keriso o?”

³⁰Vadaeni idia be hanua idia rakatania, Iesu dekenai idia lao.

³¹Unai neganai ena diba tahua taudia ese Iesu idia hamaoroa, idia gwau, “Rabi e, oi aniani.”

³²To ia haere, ia gwau, “Lau be mai egu aniani, umui diba lasi gauna.”

³³Vadaeni iena diba tahua taudia be idia sibona dekenai idia nanadaia, idia gwau, “Tau ta ese iena aniani ia mailaia vadaeni o?”

³⁴To Iesu ese ia hereva, ia gwau, “Egu aniani be inai: Lau ia siaia Diravana ena ura do lau karaia, iena gaukara do lau karaia haorea momokani.

³⁵Umui be mai emui hereva ta, ani, umui gwau, ‘Hua 4 do idia ore murinai, uiti utua negana do ia ginidae.’ To umui lau hamaoroa, emui matana umui abia isi, uma gabu umui itaia, anina be idia auka bona mage vadaeni, utua nega danu ia hegeregere.

³⁶Utua tauna ese ena davana ia abia noho, vadaeni anina ia haboua, mauri hanaihanai henia gauna. Unai dainai, hadoa tauna bona utua tauna be do idia moale hebou.

³⁷Badina inai hereva danu be ia momokani, ani, ia gwau, ‘Hadoa tauna ia hadoa gauna be utua tauna ese anina ia abia.’

³⁸Lau ese umui lau siaia, umui hekwarahi lasi gauna do umui utua totona. Haida be idia hekwarahi vadaeni, umui ese edia hekwarahi anina umui abia noho.”

³⁹Samaria taudia momo herea unai hanua lalonai ese Iesu idia abidadama henia, unai hahine ena hereva dainai. Hahine ia gwau, “Lauegu kara ibounai ia ese ia gwauraia lau dekenai.”

⁴⁰Unai dainai, inai Samaria taudia be Iesu dekenai idia lao, idia noinoi ia dekenai, idia dekenai do ia noho. Vadaeni Iesu be dina rua unuseni ia noho.

⁴¹Vadaeni Iesu ena hereva dainai, taunimanima momo ese idia abidadama henia.

⁴²Idia ese unai hahine idia hamaoroa, idia gwau, “Ai be oiemu hereva dainai ai abidadama lasi ia dekenai, to badina ai sibona ese iena hereva ai kamonai, bona hari ai diba ia be momokani tanobada ena Hamauria Tauna.”

⁴³Unai dina rua idia ore, vadaeni Iesu ia toreisi, Galilea dekenai ia lao.

⁴⁴Inai hereva be Iesu ia gwauraia guna vadaeni, ia gwau, “Peroveta tauna be iena hanua momokani taudia ese do idia matauraia lasi.”

⁴⁵To Galilea dekenai ia ginidae neganai be Galilea taudia ese Iesu idia abia dae, Ierusalema dekenai Pasova aria neganai ia karaia gaudia ibounai edia matana dekena amo idia itaia dainai, badina be idia danu unai aria totona idia lao.

⁴⁶Galilea ena hanua ta, ena ladana be Kana, dekenai ia ginidae. Unai be vanegai, ranu be uaina dekenai ia halaoa gabuna. Lohia ta Kaperanauma dekenai ia noho, iena natuna mero ese gorere ia davaria.

⁴⁷Inai lohia tauna ia kamonai Iesu be Iudea dekena amo ia mai vadaeni, Galilea dekenai ia ginidae, vadaeni Iesu dekenai ia lao, ia noinoi, do ia lao, iena natuna do ia hamauria, badina mero be kahirakahira ia mase.

⁴⁸Iesu ia gwau, “Umui be toa bona hoa kara bema umui itaia lasi, umui be do umui abidadama diba lasi.”

⁴⁹Inai lohia tauna ia gwau, “Lohiabada e, mani ita lao, egu natuna be kahirakahira ia mase.”

⁵⁰Vadaeni Iesu ese ia hamaoroa, ia gwau, “Oi lao, oiemu natuna ia mauri vadaeni.” Unai tau ese Iesu ena hereva ia hamomokania, vadaeni ia lao.

⁵¹Dala dekenai ia lao noho neganai, iena hesiai taudia idia mai vadaeni, ia danu idia hedavari. Vadaeni idia gwau, “Mero be ia mauri vadaeni.”

⁵²Vadaeni ia ese idia ia nanadaia, ia gwau, “Edena dina gauna dekenai iena tauanina ia namo?” Hesiai taudia idia gwau, “Varani dina tubua neganai, gorere ena siahu ia doko.”