Iliga꞉felo꞉ 15:23-37

²³Antio꞉g ha꞉nakiyo꞉, ililo꞉ mo꞉fo꞉s sa꞉sa꞉lo꞉ dia꞉ganeyo꞉ we. Ni iliga꞉felo꞉ kalu o꞉lia꞉ sa꞉sdo꞉ bo꞉fo꞉lowan kalu o꞉lia꞉ gi gao niliyo꞉ mada o꞉m a꞉lo꞉ to sa꞉laki, Yu kaluka꞉isalema ko꞉lo꞉ tilidabu, Antio꞉g amisa꞉ndo꞉ sabo꞉, Silia hen amilo꞉ sabo꞉, a꞉la꞉ta꞉ga꞉ Silisia hen amilo꞉ sab gimo꞉wo꞉ sagalaki, mo꞉fo꞉so꞉ a꞉na iliga꞉to꞉l.

²⁴Kalu nolo꞉ nilo꞉ wena a꞉la꞉ta꞉ga꞉ gilo꞉wa ya꞉ga꞉ wido꞉ ko꞉lo꞉, to wido꞉ a꞉ma꞉yo꞉ gio꞉ kele asulo꞉wo꞉ dima꞉kiyo꞉, no꞉nolo꞉ alifa꞉ka꞉, niyo꞉ a꞉la꞉dabu. Kalu a꞉no꞉ nili da꞉fea꞉sa꞉ga꞉ iliga꞉foma.

²⁵A꞉la꞉fo꞉ko꞉lo꞉ nio꞉ kegea꞉sa꞉ga꞉, towo꞉ imilig dia꞉ta꞉ga꞉, ni o꞉lia꞉lo꞉ ha꞉fo꞉lo꞉ disa꞉ kaluwo꞉ Fol dia꞉ Banabas dia꞉yo꞉ da꞉feyo꞉. A꞉la꞉ta꞉ga꞉ kalu nolo꞉ a꞉la꞉ gasa mena꞉ki da꞉fea꞉sa꞉ga꞉, gilo꞉wa iliga꞉to꞉l.

²⁶A꞉la꞉ma꞉ ene mela꞉no꞉ walema꞉no꞉wo꞉ mo꞉keleasulaki, Ya꞉su Keliso Alana꞉ nanog dimida꞉len ko꞉lo꞉ gilo꞉wa iliga꞉to꞉l.

²⁷A꞉la꞉ta꞉ga꞉ niliyo꞉ kalu a꞉la꞉ nowo꞉, Yuda꞉s dia꞉ Sailas dia꞉yo꞉, to nililo꞉ sa꞉sa꞉lo꞉l a꞉no꞉ko꞉ a꞉la꞉ma꞉yo꞉lo꞉ sama꞉ki iliga꞉to꞉l.

²⁸A꞉la꞉fo꞉ko꞉lo꞉ Godeya꞉ Mamayo꞉ ni o꞉lia꞉ iliki, to we a꞉na saefa꞉ ko꞉lo꞉ hida꞉yo꞉ nolo꞉ gimo꞉ dima꞉kiyo꞉ mo꞉sa꞉ma꞉no꞉, ko꞉sega ele imilig gimo꞉wo꞉ sa꞉ma꞉nigo꞉lo꞉ we.

²⁹Ma꞉no꞉ ko꞉lo꞉ madali godemo꞉lo꞉ dimiab a꞉no꞉ na꞉so꞉bo. A꞉la꞉ta꞉ga꞉ no꞉ ho꞉bo꞉ a꞉no꞉lia꞉, no꞉wo꞉ dagasa silisa꞉nda꞉sa꞉ga꞉, ho꞉bo꞉wo꞉ mo꞉ane a꞉no꞉lia꞉yo꞉, na꞉so꞉bo. A꞉la꞉ta꞉ga꞉ wo꞉wo꞉ dia꞉so꞉bo. Man a꞉no꞉ kuduha꞉nalega, gio꞉ kobale mesa꞉ib. To nililo꞉ gimo꞉lo꞉ so꞉lo꞉lo꞉ o꞉m.

³⁰Mo꞉fo꞉s sa꞉sa꞉lo꞉ a꞉no꞉ dia꞉sa꞉ga꞉, kalu iyo꞉ Ya꞉lusalem a꞉no꞉ ta꞉ta꞉sa꞉ga꞉, Antio꞉g a꞉na ha꞉na꞉ga꞉ fa꞉la꞉dowakiyo꞉, sa꞉s kaluka꞉isaleyo꞉ kegea꞉sa꞉ga꞉, mo꞉fo꞉s sa꞉sa꞉lo꞉ a꞉no꞉ agelema꞉ki, dimi.

³¹Mo꞉fo꞉s sa꞉sa꞉lo꞉ a꞉no꞉ ko꞉lo꞉ agelaki, da꞉bu amio꞉, tilidabu ililo꞉ halale alitakilo꞉ to sio꞉ a꞉no꞉ da꞉dakiyo꞉, sagalo꞉wo꞉ alan dowo꞉.

³²A꞉la꞉ta꞉ga꞉ Yuda꞉s dia꞉ Sailas dia꞉yo꞉, Godeya꞉ ene dinali sa꞉lan kalu dowo꞉ ko꞉lo꞉ a꞉la꞉ma꞉yo꞉ tilidabu ililo꞉wo꞉ halale dowa꞉i hamana꞉ki, tilidabu kaluka꞉isalemo꞉wo꞉ wala sa꞉la꞉len.

³³A꞉la꞉yo꞉ ho꞉len nolo꞉ to mano꞉ wida꞉liki, Antio꞉g a꞉naka o꞉sa꞉ga꞉yo꞉, a꞉la꞉lo꞉ iliga꞉fo꞉ kalulo꞉wa a꞉ma꞉la꞉ hamana꞉kiyo꞉, iliyo꞉ a꞉la꞉mo꞉wo꞉ sagale alita꞉sa꞉ga꞉, a꞉ma꞉la꞉ Ya꞉lusalem iliga꞉fo꞉.

³⁵Ko꞉sega Fol dia꞉ Banabas dia꞉yo꞉ a꞉naka o꞉siliki, a꞉la꞉ o꞉lia꞉ kalu nol o꞉lia꞉ma꞉yo꞉ Alana꞉ to mano꞉ wida꞉len.

³⁶Ho꞉len nolo꞉ ta꞉ta꞉sa꞉ga꞉yo꞉, Fol eyo꞉ Banabasbo꞉wo꞉ a꞉la꞉sio꞉, “Na꞉no꞉ a꞉ma꞉la꞉ amisa꞉n ko꞉li ko꞉lilo꞉ Alana꞉ to mando꞉ wida꞉i anelo꞉ a꞉namio꞉ ha꞉na꞉ga꞉, iyo꞉ waga dimida꞉li sabele a꞉la꞉liki ba꞉da꞉i ha꞉na꞉nigo꞉l” a꞉la꞉sio꞉.

³⁷A꞉la꞉sa꞉labiki, Banabas eyo꞉ Yon Mago꞉ tililia꞉ga꞉ ha꞉na꞉no꞉ asulo꞉ ko꞉sega, Fol eyo꞉ Mag e tililiha꞉na꞉no꞉ a꞉la꞉bo꞉ mo꞉asulo꞉, mo꞉wo꞉ tamin amio꞉ ililo꞉ wida꞉i ane amio꞉, Mag e Bafilia hen a꞉namio꞉ a꞉la꞉yo꞉ ta꞉ta꞉ga꞉, nanogo꞉ elo꞉ dia꞉i ha꞉na꞉len a꞉no꞉ kata꞉fo꞉.