Hwan 20:6-25

⁶A ta datang ni Pedru nga dumagdag ta takdayen a nagdulot hala simarok, a aitan na la ya ga-gamit kiden nga nefufutefut ikid na panyawen nga nebadbad ta ulu na en,

⁷a awena nehebing na panyawen ta ga-gamit kiden, te nakappil nehugtuk.

⁸A sangaw dumagdag hapa simarok ya takdayen nga imunnan tentu. A tentu en nakaita ta ga-gamit kiden a yen ya nangurugan na ta natolay hala i Hesus,

⁹te aweda para la amu ya ikayat na uhohugan na surat kiden nga dana nangibar ta pasi na ikid na katolay na hala sangaw.

¹⁰A tekid na nabalin ten a dumatang kid na ta bali da.

¹¹Ammi te Mariya en nga dumagdag hapa ta duwa kiden a nasirak la ta lawan na tanamen nga nakatangtangit. A tentu para la nagtangit a simisirib hapa ta umag na tanamen,

¹²a naita na ya duwa na anghel nga nagbarawasi ta furaw, te imatuttud kid la ta nagiddan na bari ni Hesusen, takday ta ulwanan na en, a takday ta kasoyadan na en,

¹³a “Anu magtangit ka?” kunda tentu. “A onay, te itta ya umange nangalap ta dafu ken, a awek amu am had ya nangikinan da tentu,” kunna.

¹⁴Ammi tentun nakauhohug ta isin a pa nagbalittag bit, a naita na ya umatayuk ta talekud na en, ammi awena amu ta intu hala i Hesusen.

¹⁵“Anu magtangit kan, aboy? Inya hud ya apagam ta isin?” kunna ta babbayen. Ammi pahig ni Mariya ta intu hala ya magtaronen ta kakayunen, a “Ser, am iko ya nangitugut ta bari na dafu ken a ibar mu haen teyak am had ya nangikinam tentu, te enku sangaw alapan,” kunna tentu.

¹⁶A “Mariya,” kunna ha ni Hesus tentu. A ta nepangngagan na ta babbayen a pake nagbalittag na nga gumafut tentu, a “Raboni, anu iko kad,” kunna, (te Raboni ya nangingaganan da ta mistro da).

¹⁷A ya uhohug ni Hesus tentu a “Awem na mina gafgafutan ya barikin, te mappya ta timullu yak para te Damakewan, a yen sangaw ya pake pakkamum teyak ta mappya. A e kan mantu ta kabagis ku kiden, te ibar mu tekid ta eyak na te Damakewan Namaratu, a intu hala ya Dama muy ikid na Namaratu muy,” kunna.

¹⁸A ta nepagtugut ni Mariya en a enna nebar ta natolay hala i Hesus ta ituldu na kiden. “Naitak kad na ya Dafu tamen O, ikamuy,” kunna tekid, yaga nebar na hapa ya inuhohug ni Hesus tentu.

¹⁹A sangaw ta hiklam ta ye-yen para na araw, araw na Liggu, a itta ya ituldu na kiden ta takday bali, a sa nalitupan ya ngamin irwangan na bali en gafu ta talaw da ta pinakadakal da kiden nga Hudyo. Ammi ka-ma la naglattog i Hesus nga nagtayuk ta nagtatangnganan da en, a “Namaratu ewan ya makkamu tekamuy,” kunna tekid.

²⁰A sangaw neuyad na ya kamat na kiden tekid petta maita da ya piglat na lansa kiden, otturu netuldu na hapa ya piglat na pika en ta hakbu na en. A tekiden nakaita ta intu hala ya dafu da en Hesus a pake nefulot ya talak da tentu.

²¹“Namaratu ewan ya makkamu tekamuy,” kunna ha tekid, “te doban ta kam nga ange mangipadangag ta uhohug ku ta kuman na nepangidob ni Damakewan teyak,” kunna, kapye na kid inaswangan.

²²A tentu en nagaswang tekid a “Pagdulotan muy na ya Kahalwa na Namaratu nga manguffun tekamuy.

²³A ya ngamin kiden pakoman muy ta liwat da kiden gafu ta pangurug da ta ipadangag muy a yen kid hala ya pinakoman na Namaratu ewan. Ammi ta awemuy kiden pakoman gafu ta aweda mangurug a itta hala tekid ya liwat da kiden,” kunna.

²⁴Ammi ta napolu en nepakipaita ni Hesus ta ituldu na kiden a awan i Tomas tekid, ammi Siping ya agngilinan da tentu.

²⁵A sangaw ta ketta na en tekid a nebar da tentu, “Naita min ya dafu tamen,” kunda tentu. Ammi ya tabbag na tekid a “Awek sangaw kurugan ta intu am awek bit maita ya gafan na lansa ta kamat na kiden, te yaga iparubak ya guramay kin ta piglat na kiden ta kamat na kontodu hakbu na en,” kunna.