Yohana 20:6-25

⁶Simoni Petulo naye eze amtimile, engila mwe mbila, umo kawona isanda,

⁷na isuche azingigwe Yesu mo mtwi. Iyo isuche nandile haihamwenga ne sanda, mna naizingwa saviya naili mo mtwi, ikwa hantu hakwe.

⁸Vikaheza yudya mwanampina mtuhu alongole kubula kwe mbila, niyo engila mndani. Awona niyo azumila.

⁹Nahawenati kumanya Mawandiko Yakukile yawandikwe kugamba vyaungwa auyuke.

¹⁰Niyo wanampina wauya kaya.

¹¹Maliyamu nakachimala kuse kwembila. Kuno achei kwila, kafunama asungila kwe mbila.

¹²Niyo awona wandima wa kwembingu waidi wavikile suche zing'aile, wekala hadya umwili wa Yesu wagonezagwa, yumwenga ko mtwi ywa kaidi kweviga.

¹³Awo wandima wa kwembingu wamwuza, “Mnala, ni mbwani ukwila?” Naye awagamba, “Wamusa Zumbe dyangu, naho simanyize uko wamwikiye!”

¹⁴Eze alonge ivyo, niyo ahituka kunyuma, amwona Yesu kachimala ahadya, mna asekumanya kugamba ni Yesu.

¹⁵Yesu amuza, “Mnala ni mbwani ukwila? Wamlonda yuhi?” Maliyamu nakafanyanya kugamba uyo ni mwamizi ywe chibuta, amgamba, “Mkulu, uneva ni weye umusize, nigambila uko umwikiye miye nimguhe.”

¹⁶Yesu amgamba, “Maliyamu!” Naye Maliyamu ahituka, amgamba kwa Chiebulaniya, “Laboni.” Nuko kugamba “Mhinyi.”

¹⁷Yesu amgamba, “Usekunikufya kwaviya sinati kwita kulanga kwa Tate. Mna hita kwa walukolo wangu uwagambile, naita, kulanga kwa Tate nanywi nuyo Tati yenyu, Chohile ywangu nanywi nuyo Chohile ywenyu.”

¹⁸Ivyo Maliyamu Magidalena niyo aita akuwagambila wadya wanampina, awagamba, “Simwona Zumbe”. Nakugamba nakamgambila ivyo.

¹⁹Yendaga chisingi cha zuwa dya kuhumula wanampina nawadugana hamwenga mndani mwe nyumba, nyivi nazivugalwa kwaviya nawakawogoha vilongozi wa Chiyahudi. Yesu niyo eza, achimala hagati hawo, awagamba, “Utondowazi utende kwenyu!”

²⁰Eze alonge ivyo, niyo awalagisa imikono yakwe no lubavu lwakwe. Awo wanampina weleleswa kumwona Zumbe.

²¹Yesu awagamba vituhu, “Utondowazi utende kwenyu! Saviya Tate anisigile miye nami nawasigilani nyuwe.”

²²Eze alonge ivyo niyo awavila awagamba, “Hokelani Muye Ukukile.

²³Hegu mnawalekeila wantu masa yawo, masa yawo nayalekeilwe. Mna hamnawalekeile, hawalekeilwe masa yawo.”

²⁴Mna Tomaso zina tuhu naketangwa pacha nendile hahali umo Yesu akeza.

²⁵Ivyo wadya wanampina watuhu wamgamba, “Chimwona Zumbe.” Tomaso awagamba, “Sinawone nkwasulo ze mitunga mwe mikono yakwe, na kupampasa umkono wangu mo lubavu lwakwe, sanizumile.”