Yowan 20:6-25

⁶Wal mënţ, kë Ŧimoŋ Piyeer aşë ban ; aneej du bhër, aten ilaañ.

⁷Akak aten blaañ bambooţanaanuŋ bkow kë babëkan bnuura awo mpaţ.

⁸Wi wi naţaşarul undu ambanuŋ uŧeek abaaŋ aneej. Awin akuţ afiyaar.

⁹Na manjoonan te wal mënţ baando bi me kë jibi bapiiŧuŋ ţi Ulibra wi Naşibaţi, Yeŧu awo i kanaţa ţi pkeţ.

¹⁰Baţaşarul bakak wal mënţ du katoh ki baka.

¹¹Mariya anaţ du kañog bhër du bdig, awooni. Wi akwooniiŋ, aşë juţ aten du bhër meeţ.

¹²Awin ŋwanjuŧ ŋtëb ŋanwohi imişa ifaaŧal kë ŋaţo ţi dko di puum pi Yeŧu pabiiŋ abëkan, uloŋ du bkow, uloŋ du ihoţ.

¹³Ŋwanjuŧ ŋuŋ ŋaji na a : « Abuk ñaaţ, we wi ikwooniiŋ ba? » Kë aji na ŋa : « Dwooni ţiki bapënan Ajug naan, kë mëmme dko di baţu'u li. »

¹⁴Wi ajakuŋ haŋ aşë kok, awin Yeŧu kë anaţi, kë aşë wo aamme kë ul a.

¹⁵Kë Yeŧu aşë ji na a : « Abuk ñaaţ, we wi ikwooniiŋ ba? In i iklaaŋ ba? » Mariya aji me nalemp i uwoorta a, aşë ji na a : « Naweek, woli iwi iyaaŋ na a, kţupën dko di iţu'uli, dya kajeja. »

¹⁶Kë aji na a : « Mariya! » Kë aşë kok aji na a ţi uţup uhebërë: « Rabuni! » uwooŋ najukan.

¹⁷Kë aji na a : « Kmëbanaan, mëndo bi paya du Paapa. Yaan iwin bayiţ naan iji na baka dpaya du Paapa, anwooŋ kak Aşin baka, du Naşibaţi, anwooŋ kak Naşibaţi i baka. »

¹⁸Kë Mariya i ubeeka wi Magdala aşë ya aji na baţaşar Yeŧu : « Dwin Ajugun. » Kë hënk di di akakalëşuŋ baka uko wi ajakuluŋ.

¹⁹Ţi utaakal wi unuur unţaşuŋ unuur wi pnoorfën baţaşar Yeŧu bayit du katoh kaloŋ anigan ilëman bŧi ţiki baţi baweek biki bayuday, kë Yeŧu aşë bi anaţ ţi pŧoof pi baka aji : « Bnuura bawo na an! »

²⁰Wi ajakuŋ haŋ, aşë diiman baka iñen na kanŧaagan. Baţaşarul balilan maakan wi bawinuŋ Ajugun.

²¹Akak aji na baka : « Bnuura bawo na an. Jibi Paapa ayilnuŋ, hënk di di nkaaŋ ayilan. »

²²Wi ajakuŋ haŋ, aşë fuuţ ţi baka aji : « Nayeenkan Uhaaş wi Naşibaţi.

²³Bañaaŋ biki nakmiiruŋ ipekadu, Naşibaţi amiir baka ya ; kë biki nawooŋ naankmiir ya, Naşibaţi aankmiir baka ya. »

²⁴Kë Tooma, aloŋ ţi baţaşar Yeŧu iñeen na batëb i bajaaŋ bado kbet aşë wo aanwo da wi Yeŧu abiiŋ du baka.

²⁵Kë baţaşar Yeŧu bandukiiŋ başë bi aji na a : « Ŋwin Ajugun! » Kë aşë ji na baka : « Woli mënwin ţi iñen yi nul dko di bapaŋuŋ ireegu, kë woli mënţu pkoñ pi naan ţi da, woli mënţu kañen ţi kanŧaagan ki nul, nin mënkfiyaar. »