Jon 20:6-25

⁶Mi ehiga Saimon Pitönöŋ mewöyök andöŋe kaŋgota köt köteŋ uruŋe öŋgöba opoŋi köpeköpeiŋanök ahöi ehök.

⁷Mi ehök aka nöröpŋi opo jahönŋi kunöŋ köpeiba esuhugeri, mi tosatŋan kusuba silegö opoŋi miambuk qahö mindiriba kungen algetka nanŋök tariga ehök.

⁸Mewö ehiga gwarek alaŋan mutuk qaksirinöŋ kaŋgoröhi, yaŋön mewöyök köt köteŋ uruŋe öŋgöba yuai mi eka möt nariyök.

⁹Jisös guliba kömupnöhök wahötmawi, yetkön Buŋa Kimbigö keu mewöŋi mi qeljiŋe qahö möt asariba tönpin mala korohot. Mewö.

¹⁰Mala kota miaŋgöreŋök möt nariba liliŋgöba miriŋire anohot.

¹¹Yetkön anohotmö, Marianöŋ nanŋök qaksirigö köt köteŋ numbuŋe kinda sahörök. Mewö sahöta köteŋ urorohoŋi miaŋgö uruŋe kököriba ui anök.

¹²Ui aniga Suep garata yahöt malukuŋiri tuat lalamŋi etkehök. Jisösgö qamötŋan ahöyöhi, yetkön mönö miaŋgöreŋ tarohot. Kunöŋ nöröpŋi ahöyöhaŋgöreŋ tariga kunöŋ könaŋe tarök.

¹³Mewö tata kewö jiyohot mörök, “Ambi, gi mönö wuanöŋgöra sahötzan?” Mi möta jiyök, “Kembunaŋgö qamötŋi memba anda denike alget ahözawi, mi qahö mötzal.”

¹⁴Mewö jiba liliŋgöba Jisösnöŋ kösutŋe kiniga ehökmö, kaisoŋgolomŋi mi qahö ek kutuba tönpin kinök.

¹⁵Tönpin kiniga Jisösnöŋ kewö qesim waŋgiyök, “Ambi, gi mönö wuanöŋgöra sahötzan? Dagöra jaruzan?” Mewö qesim waŋgiiga arö galömŋan kinja me denöwö, mewö mötmöriba kewö jiyök, “O ketaŋamni, gi qamötŋi memba aŋguba kungen anda alnöŋ ewö, mönö denike ahöza, mi jinöŋga möta anda memam.”

¹⁶Mewö jiiga Jisösnöŋ qetŋi qeta “Maria!” jiyök. Mi qeta jiiga yaŋgöreŋ liliŋgöba Hibru keunöŋ qeta “Raboni!” jiyök. Mi nanine keunöŋ “Ketaŋamni.”

¹⁷Mewö jiiga kewö jii mörök, “Ni Iwinaŋgöreŋ qahö öŋgöba ki kinjal. Miaŋgöra ni kude nömisirimanmö, nöŋgö munurupni yeŋgöreŋ anda buzup kewö jinöŋ mötme: Nöŋön mönö Iwi Anutuni aka eŋgö Iwi Anutuŋini yaŋgöreŋ liliŋgöba öŋgömam.”

¹⁸Mewö jii möta Magdalagö ambi Maria yaŋön liliŋgöba anda gwarekurupŋi kewö jii mötket, “Nöŋön Kembu ekiga keu mewö mewö jii mötzal.” Mewö.

¹⁹Sonda miaŋgöreŋök miri söŋauiga gwarek yeŋön ömbibiŋe tokoba Juda yeŋgöra keŋgötŋini möta miri naŋguŋi köla ki namŋi misiget geiga tatket. Mewö tatketka Jisösnöŋ asuhuba sutŋine kinda kewö jiyök, “Alaurupni, luainöŋ embuk ahöma!”

²⁰Mewö jiba böröyahötŋi aka marömŋi kondeliga Kembu eketka sösöŋgainöŋ uruŋini kokolak qeyök.

²¹Kokolak qeiga toroqeba kewö jiyök, “Alaurupni, luainöŋ embuk ahöma! Iwinöŋ ni melaim niŋgiiga nöŋön iŋini mewöŋanök melaim eŋgizal.”

²²Mewö jiba nöröpŋine memba ösum eŋgiba uwulamgöba jiyök, “Mönö Uŋa Töröŋi meget.

²³Iŋini ambazip siŋgisöndokŋini mosöta saŋgoŋje ewö, mi mönö Anutugö jeŋe solanim teköza. Ambazip siŋgisöndokŋini qahö mosöta saŋgoŋje ewö, mi mönö Anutugö jeŋe qahö solaniza.” Mewö.

²⁴Jisösnöŋ gwarekurupŋi mewö asuhum eŋgiyökmö, gwarek 12 yeŋgöreŋök kun qetŋi Tomas, qetŋi alaŋi Siwisiwi qetkeri, yaŋön nalö miaŋgöreŋ sutŋine qahö malök.

²⁵Tomasnöŋ kaiga gwarek tosatŋan “Mönö Kembu ekzin,” jiget möta kewö jiyök, “Jenan biriŋ löpötŋi böröŋe eka kesötnan marömŋe misirimam ewö, mönö ölöp möt narimam. Ni nanak mi qahö eka misiriba oseimam ewö, mönö keuyök jiget möta ölŋa mi qahö möt narimam.”