HECHOS 8:27-39

²⁷Lex wruu Blib za Blib; nëz wga te mgyey-Etiopía lo Blib. Te mennon nak men, porke laa men nak tesorer lo Candace wnaa ne rnebééy ydendxee Etiopía. Che wak mgyeey guin operar chen tsuudet zhiin men. Jerusalén wa men wazaknon men Dëdyuzh.

²⁸Chene wberee men ne sya men laz men, zob men lenxkarret men kayool men lo liber ne wkaa profet-Isaías.

²⁹Lex re Espíritu Sant lo Blib: ―Gubig guex lo karret gwa.

³⁰Chene wbig guex Blib, won Blib kayool mgyeey guin lo liber ne wkaa profet-Isaías, lex wnabdiiz Blib lo men, re Blib: ―¿Pe rdee de kwent negwa ne kayool de?

³¹Wke men re men: ―¿Pezee ydee noo kwento si rut rzëëdet gan pe rna we lo noo? Lex re men lo Blib ne gyeep Blib lo karret, sob Blib koo men.

³²Zeree re lo xgyiich Dëdyuzh ledne kayool men: Wano mén men chen yket mén men zegne rket mén mëkzhiil, no bet redet men, wlaa men zegne rlaa mëkzhiil bëën bëënleg ne che zu lo mén ne ygaa gyits led maa.

³³Wlaa yra mén men logne wlaantee mén, rut wruudet xfabor men; naaree naa ne wket mén men, ¿txu gun gan yzëët yra ne mal ne wlaa mén ne nzëël men?

³⁴Lex re mgyeey guin lo Blib: ―Gulaa fabor guzëët gan txu por laa rnii profet nee: ¿pe por laake zhaa ne, u por ste mén ne?

³⁵Lex wzelo Blib wzëët Blib gan pe rna xdiiz Dëdyuzh ledne kayool men, zenga wzëët Blib xdiznzoon Jesucrist lo men.

³⁶Zhich guin chene wdxiin men yrup men Blib te ledne nuu nis, re men lo Blib: ―Nee nuu nis; ¿pe gakdet yrobnis noo?

³⁷Wke Blib, re Blib: ―Belne rlaleedx de neree ydebgyiky ydeblextootee de, zako. Wke men re men: ―Rlaleedx noo ne XPee Dëdyuzh nak Jesucrist.

³⁸Orguin wkyeen men wnesutsë mén karret, lex wyët men lo karret yrup men Blib, wdee men lo nis wtxobnis Blib men.

³⁹Chene wruu men lo nis yrup men Blib, weey Espíritu Sant Blib, wiidetre men Blib; per kesentyent rzhiilen men wyuli men nëz ste.