27Felipe la̠li̠huán táca̠xli y alh nac a̠má tiji, antá chú xtla̠huama acxni̠ ta̠tanoklhchá cha̠tum chixcú xalac Etiopía, eé chixcú luu tali̠pa̠hu xuani̠t nac xca̠chiquí̠n porque xta̠ma̠peksi̠nán reina Candace, xli̠pu̠lhca̠cani̠t li̠tesorero nac Etiopía, xlá antá qui̠lakachixcuhuí̠nalh nac Jerusalén.
28Y chú aya xtaspitma nac xca̠chiquí̠n y culucs xuí nac xcarreta hua̠ntu̠ xtalhtancalé̠n tantiy cahua̠yu, xlá xli̠kalhtahuakati̠lhay xlibro profeta Isaías.
29Espíritu Santo chiné ma̠lacpuhuá̠ni̠lh Felipe: —La̠li̠huán catlá̠huanti y cama̠tá̠xtucti a̠má carro.
30Acxni̠ li̠huana̠ talacatzúhui̠lh xlá káxmatli pi̠ huá xli̠kalhtahuakama xlibro profeta Isaías, y chiné kalhásquilh: —¿Pi̠ akata̠ksa huix hua̠ntu̠ li̠chuhui̠nama tamá libro?
31Amá chixcú kálhti̠lh: —Pero ¿lácu nacliakata̠ksa si ni̠ti̠ quima̠lacti̠tumi̠niy hua̠ntu̠ luu huaniputún? Huata a̠má chixcú huánilh Felipe xlacata catahuácalh nac carro y catáhui nac xpa̠xtú̠n.
32Nac a̠má libro hua̠ntu̠ xli̠kalhtahuakama chiné huan: Cumu la̠ tantum ma̠ntzu borrego lé̠ncalh antanícu namakni̠cán, y ni̠para tzinú tatlancá̠ni̠lh acxni̠ makní̠calh. Y cumu la̠ borrego ni̠ tasay acxni̠ maksitcán, na̠ ni̠para huá tásalh nac xlacati̠ncán hua̠nti̠ tama̠pa̠tí̠ni̠lh.
33Xlá ma̠xoko̠ní̠calh hua̠ntu̠ ni̠ xtlahuani̠t, y ni̠para cha̠tum tícu xkalhmaktá̠yalh; ni̠para tzinú li̠chuhui̠namputu hua̠ntu̠ tatlahuánilh hua̠nti̠ lacxtum xca̠ta̠stacni̠t. ¿Tícu cahuá nahuán pi̠ luu maka̠s tilatáma̠lh, o nícu natamina̠chá xli̠talakapasni? Si maktum makní̠calh y ma̠laksputunícalh xlatáma̠t nac ca̠quilhtamacú.
34Amá chixcú xalac Etiopía chiné kalhásquilh Felipe: —Catlahua li̠tlá̠n, caquihuani lácu eé qui̠taxtuy. ¿Tícu li̠chuhui̠nama eé profeta? ¿Pi̠ caj sacstu li̠chuhui̠namá̠calh, osuchí huí túnuj chixcú hua̠nti̠ xli̠chuhui̠nama?
35—Pus nacma̠lacti̠tumi̠niyá̠n hua̠ntu̠ huaniputún —huánilh Felipe. Tzúculh li̠ma̠kalhchuhui̠ni̠y a̠má tatzokni xla profeta Isaías hua̠ntu̠ xlá xli̠kalhtahuakama y huaniko̠lh la̠ta lácu Jesús makní̠calh y lácu xlá lakma̠xtunún.
36Luu acxni̠ chú xtati̠lacatza̠lamá̠nalh lacatum antaní huí chúchut a̠má chixcú huánilh Felipe: —Uú huí chúchut, ¿lácu pi̠ ni̠lay para la̠nchuj tuncán xactaakmúnulh?
37—Para ca̠najlaya xli̠hua̠k minacú tla̠n nataakmunuya —kálhti̠lh Felipe. Y a̠má chixcú kálhti̠lh: —Aquit cca̠najlay pi̠ Jesucristo huá Xkahuasa Dios.
38Amá chixcú ma̠peksí̠nalh xlacata cama̠chokócalh carreta y xcha̠tiycán tatá̠ctalh táalh antaní xuí chúchut, antá chú nac chúchut Felipe akmúnulh a̠má tali̠pa̠hu chixcú xalac Etiopía.
39Acxni̠ chú aya tatácutli nac chúchut y tapa̠táxtulh tiji Espíritu Santo le̠lh Felipe a̠lacatunu y a̠má chixcú niaj úcxilhli, pero huata xlá luu li̠pa̠xúhu táspitli nac xpu̠latama̠n.