Polien 8:27-39

²⁷Ma Pilip bue xat xi e ba. E melele nen ak, eilep tei te kantri te hal Itiopia di nggusil suse ak. Xi be eilep tei xa di milaxat mani xil vus na suv toto te hal Itiopia xa be atou, hisen Kandis. Eilep ak tehe Serusalem tengan vamot mi Hi,

²⁸e di, nggusil suse nan tengan vatilomun vahe ut san. E melele xa ba, di miloh e kat tei xa hos milihi. E melele xa dotan de kat, di buli rut sepinien e Vanuvei Eo na Hi xa provet Aesea tetisi.

²⁹Ma Ninin Eo biteni mi Pilip bit, “Uha, ha uhe sangas visal moletin xa di miloh e kat iaxor.”

³⁰Misak ni, Pilip miloh be sangas visal kat ak e milonge xa eilep ak di buli sepinien xa provet Aesea tetisi. Ma misisi bit, “?Xouk okil koute te naha xa di obuli iaxai?”

³¹Eilep ak bit rilomun ni mini bit, “?Xosxa moletin ti navit kila minou, ma nikil koute teni itep?” Ma eilep ak misis Pilip tengan vapeou vaha vatotan vatela e kat nan.

³²Melele xa Pilip ba dotan dela, pusi xa eilep ak di buli rut sepinien te Vanuvei Eo na Hi xa biteni bit, “Moletin ak, texoni sulut sipsip tei xa ladela tengan ha lavasi vamat, xi tenavit pas ti sepinien. Io, xi tenatangal ti nggoni sipsip tei e melele xa di lakot rerat hilin.

³³Melele xa latelepis rin nan, latnapol ni ti tenamal mini. Lasakras lanem usil horamue nan xil vengan xa latehur xoteh meulien nan e ut etan.”

³⁴Eilep ak misis Pilip bit, “Hiteni minou li. ?Provet ak di misep usil visi vari xiak? ?Di misep usil xi mun tang, mu moletin tova?”

³⁵Ma Pilip bit kil koute te sepinien ak mini e misetu mun ni longeongen hos usil Iesu Kristo mini. Melele xa biteni mak, eilep ak mike reitin en.

³⁶E melele xa di lunggusil suse luba, lumei e rute tei xa oei di en. Ma eilep ak biteni mi Pilip bit, “!Pus ti! Oei xi tak. Xosxa onemi obit bos, ma ubaptaes ni nou li en.”

³⁷E Pilip bit rilomun ni mini bit, “Nakila nibaptaes ni xouk en xosxa oke reitin en nggo meulien tevi nam.” Ma xi biteni bit, “Inou nake reitin xa Iesu Kristo be Nat Hi.”

³⁸Ma, eilep ak biteni mi moletin nan tengan vapol ni kat nan vangel. Di, xal Pilip, lukakao lube oei, e Pilip baptaes ni en.

³⁹E melele xa xalu di lukakao lumea reling oei, vatei takes, Ninin Eo na Hi mei nggur rat Pilip ra rute ak. E eilep ak tapus ti mun. E neta sav xa mak, eilep nggusil suse nan ba del memesien mi Hi.