Hechos 8:18-33

¹⁸Catiꞌ bléꞌinëꞌ Simón, bönniꞌ udzáꞌ naꞌ, le guc catiꞌ gulaxóa naꞌquëꞌ bunách niꞌ gbaz naꞌ nasölëꞌë Cristo, dusóalenëꞌ lequëꞌ Dios Böꞌ Laꞌy, guꞌnnëꞌ quizxjëꞌ lequëꞌ dumí,

¹⁹rëꞌ lequëꞌ: ―Benn caꞌ quiaꞌ yöl‑laꞌ huac ni, quië catiꞌ gxoa naꞌa nútiꞌtëz bunách, dusóalenëꞌ nu naꞌ Dios Böꞌ Laꞌy.

²⁰Niꞌr gudxëꞌ lëꞌ Pedro, rnëꞌ: ―Nit tsazxö́n len liꞌ dumí quiuꞌ, le ráquinuꞌ len dumí gdél‑liꞌnuꞌ yöl‑laꞌ huac queëꞌ Dios.

²¹Cutu nacuꞌ lsacaꞌ gutsuꞌu lë ni, le cunác dxiꞌa icj ládxiꞌdaꞌu lahuëꞌ Dios.

²²Bubíꞌi ladxuꞌu ca nac huiaꞌdöꞌ ni runuꞌ, len gútaꞌyu lahuëꞌ Dios, nazx caꞌ unít lahuëꞌ liꞌ ca nac lë ni rzaꞌ ladxuꞌu.

²³Rléꞌidaꞌ nabaguꞌu zxguiaꞌ len nadzunuꞌ lu yal‑lj qui tuꞌ xöhuiꞌ.

²⁴Niꞌr bubiꞌë didzaꞌ Simón naꞌ, rëꞌ lequëꞌ: ―Gul‑lidzëꞌ Dios, gátaꞌyuliꞌ lahuëꞌ Xanruꞌ niꞌa quiaꞌ cui gac quiaꞌ nitú lë naꞌ chgnaliꞌ.

²⁵Catiꞌ budx glunëꞌ lnaꞌ lau queëꞌ Cristo lu yödz niꞌ Pedro len Juan naꞌ, len gulaguíxjöꞌë xtidzëꞌë Dios, glunëꞌ caꞌ lban qui didzaꞌ dxiꞌa gap nacuáꞌ zian ladzquëꞌ bönniꞌ Samaria, atiꞌ gdöd niꞌ yhuöjquëꞌ Jerusalén.

²⁶Niꞌr bë́ꞌlenëꞌ Felipe didzaꞌ gbaz laꞌy queëꞌ Xanruꞌ, gudxëꞌ lëꞌ: ―Gyas len gyeaj zacaꞌ ga rdöd gbidz beoꞌ ziag, gdxinuꞌ ga niꞌ rlaꞌa nöz zeaj Jerusalén zeajtë yödz Gaza, nöz naꞌ rdöd lu latj caꞌz.

²⁷Niꞌr gyuꞌë nöz Felipe naꞌ, zijëꞌ. Laꞌ nöz niꞌ yajtsaguëꞌ bönniꞌ Etiopía, naquëꞌ bönniꞌ huödx. Luyú Etiopía naquëꞌ blau launu Candace, ngul rna béꞌinu bunách Etiopía naꞌ, len yuꞌu lu nëꞌë yúguꞌtë yöl‑laꞌ tsahuiꞌ queënu dzöꞌ lidxnu. Gyijëꞌ Jerusalén bönniꞌ ni quië gyij ladxëꞌë Dios.

²⁸Naꞌa, zhuöjëꞌ ladzëꞌ, röꞌë lu carreta queëꞌ, len rulabëꞌ le nayúj lu guich ca gnëꞌ Isaías, bönniꞌ bëꞌë didzaꞌ uláz queëꞌ Dios.

²⁹Niꞌr Dios Böꞌ Laꞌy gudxëꞌ Felipe naꞌ: ―Gbigaꞌ ga zeaj carreta naꞌ, len gyeajlen lei.

³⁰Catiꞌ chgbiguëꞌë niꞌ Felipe, byönnëꞌ ruꞌë didzaꞌ bönniꞌ huödx naꞌ, rulabëꞌ le nayúj lu guich ca gnëꞌ Isaías, atiꞌ gudxëꞌ lëꞌ: ―¿Naruꞌ réjniꞌnuꞌ lë naꞌ rulabuꞌ?

³¹Bubiꞌë didzaꞌ bönniꞌ Etiopía naꞌ, gnëꞌ: ―¿Nacx gac tséjniꞌdaꞌ chquiꞌ nutu nu zoa uzejniꞌi nedaꞌ? Niꞌr gútaꞌyuëꞌ lahuëꞌ Felipe cuenëꞌ len cö́ꞌlenëꞌ lëꞌ tsazxö́n lu carreta naꞌ.

³²Lë naꞌ nayúj lu guich rulabëꞌ, rna cni: Ca böꞌcuꞌ zxílaꞌdauꞌ, Gulachë́ꞌë Lëꞌ quië ludöddëꞌ Lëꞌ, Len ca böꞌcuꞌ zxílaꞌdauꞌ, Cutu rnëbaꞌ catiꞌ nu rchugu lítsaꞌbaꞌ, Caꞌ benëꞌ Lëꞌ, cutu bsalj ruꞌë gnëꞌ.

³³Gulucaꞌnëꞌ Lëꞌ caꞌz, Len cutu gluꞌë latj nu cuequi xbey Lëꞌ. ¿Nuzxa caz gac quixjöꞌ zxguiaꞌ nabágaꞌgac bunách uládz queëꞌ? Laꞌ légaczëꞌ guludöddëꞌ Lëꞌ.