15Xkamisaj kꞌu alaq riꞌ ri aj yaꞌl kꞌaslemal, ri Jun xkꞌastajisax lo chikixoꞌl ri ekaminaq ruma ri Dios. Puwi kꞌu riꞌ wa kꞌastajibꞌal kojtzijon wi riꞌoj ma lik oj xojilow re.
16»E ruma ri kubꞌulibꞌal kꞌuꞌxaj rukꞌ ri Jesús, xkowir ri raqan waꞌ waꞌchi kil alaq y etaꞌam ne alaq uwach. Yey ruma wa kubꞌulibꞌal kꞌuꞌxaj rukꞌ ri Jesús xkunutaj waꞌchi pa saqil wi jelaꞌ pachaꞌ katajin onoje alaq che rilik.
17»Wetaꞌam kꞌut, alaq qatz-qachaqꞌ, ri xꞌan alaq e ruma na xmaj ta alaq usukꞌ, y jenelaꞌ riꞌ xkiꞌan raj wach re ri tinamit alaq.
18Pero ruma ri xꞌan alaq che ri Jesús, ri Dios xuꞌana janipa rubꞌiꞌim lo ojertan kuma ri qꞌalajisanelabꞌ echiriꞌ xubꞌiꞌij Ruchaꞌoꞌn lo Rire kutij kꞌax.
19»E uwariꞌche tzelej tzij alaq chwach ri Dios y yaꞌa kꞌu ibꞌ alaq puqꞌabꞌ chaꞌ kakuytaj ri mak alaq y chaꞌ ri Qajawal Dios kuya uxlanem y utzil chomal chupa ri animaꞌ alaq.
20Jekꞌulaꞌ ri Dios kutaq na lo ukꞌ alaq ri Jesús, Ruchaꞌoꞌn lo Rire, ri bꞌiꞌtisim chi lo che alaq ojertan.
21Tobꞌ kꞌu woꞌora lik chirajawaxik wi ri Jesús kꞌo chilaꞌ chikaj, kopon na ri qꞌij echiriꞌ ri Dios kuꞌan tanchi kꞌakꞌ che ronoje jelaꞌ pachaꞌ ri xubꞌiꞌij lo ojertan kuma ri qꞌalajisanelabꞌ ri xetaq lo ruma Rire.
22»Ma ri Moisés xubꞌiꞌij chike ri qatiꞌ-qamam ojertan: E ri Dios Qajawxel kuyak na lo chikixoꞌlibꞌal ri qatinamit Israel jun Qꞌalajisanel jelaꞌ pachaꞌ riꞌin. Ekꞌu chita janipa ri kubꞌiꞌij Rire chiwe.
23Ekꞌu ri tikawex na kukoj ta utzij wa jun Qꞌalajisanel, riꞌ kesax bꞌi y na jinta chi re kukꞌ rutinamit ri Dios xcha ri Moisés.
24»Konoje kꞌu ri qꞌalajisanelabꞌ kipetebꞌem lo chwi ri Samuel, lik etzijoninaq lo chwi taq waꞌ wa qꞌij.
25Alaq kꞌu ri kakꞌuluw re ri xubꞌiꞌtisij ri Dios kuma ri qꞌalajisanelabꞌ y ruma ri tzij xuꞌan kukꞌ ri qatiꞌ-qamam ojertan, echiriꞌ xubꞌiꞌij che ri Abraham: Ruma kꞌu Jun chike rawalkꞌoꞌal, kebꞌenuꞌan bendecir konoje rukꞌiyal kiwach taq ri tikawex che ruwachulew xchaꞌ.
Hechos 3
Hechos 3:15-25