Aposelo 3:15-25

¹⁵Nitoapa ali atoa poome mekoa wene takoa latikagopa kime wia tukakoli tua pokanake Akolaliyo moa kamotokakale kamoa poka. Enipa Yone totame enekoomo uku.

¹⁶Ina kawata lepo taneya mekanakago kime i enoa wene tiki agopa Yesuno ibinike wene tuganeya tokome weye akatapeneya. Nipa Yesuno ibini wedekoa one patu kautakoa kakete latekatapeneya kime eni enekina.

¹⁷Ame-loe Yesu einakago wia tukakoinapa kimeka kini tobou ali-kitameka wene toamekete tokoinano wene tekene uku.

¹⁸Einapa Akolaliyo wene takane toa one agale to̱awea akane ali-kitamepa Keraisuyo tete moa tuatekamo papete wia mekapikala taneyano, kime Yesu wia tukakilepa Akolaliyo papete wene toopiane toa taatekakete tadiki.

¹⁹Nipa kini toma yakoi poanele Akolaliyo moa kogamotono, kini namolo poane wene wia wawe.

²⁰Nitikolipa Ali Munoyo kiwi weye akoa pewe wia too. Nitoapa kiwi auapeou wa one takoa moa kakapikanakago eina Yesu wa lokoa oto wetekoo.

²¹Nitatekoyake papete Keraisu a tibuke nepia meoo. Nipa Akolaliyo one agale papete to̱awea akane ali-kiti wene takakana toa taatekakome one namolo latikanakeya peya weneya latimotoa Keraisu a tibuke nepia meoo.

²²Moseseyo einago Keraisuke papete eya wa oa pianeya. Kini Ali Muno Akolaliyo one agale to̱aweane akamotoa no moa kakakana toa naniko kini wamene ago pade one agale to̱awea akamotoa moa kakoo. Nitoono, einago taatekoa nokome toe wa okale-kama tamene.

²³One nokome oka toa yakoa moamokagopa Akolaliyo one yatene pakeke katekoa atukoo wa Moseseyo oa pianeya wa Pitayo e Yu yene pubu okome akeneya.

²⁴Nimo ootokoa kakome okome totome ipete taatekoa toatekoomopa eya ago Samueleyoka to̱awea oa pianeya. One eina to̱awea oa piane toa Akolaline agale to̱awea akane ali peya lokama nekete akeneya.

²⁵Kini papete to̱awea akapianele ni Akolaliyo kiwi yatene auapeou wa kini kaua-mikiti-pala papete oa togotaneleka kime pikoa kakete opi taatekakolo enoa yakoa tiki. Enipa Eberame neeke ta̱amoa pokoi ali atoake tekene e ku yatene ta piko peyake ta̱ma pote mekoika talo toane pewe wiou wa Akolaliyo Eberame-pala oa togotopiane toa taatekoa tokoleke uku.