MII GUN MIINU MO 3:15-25

¹⁵Dhali Amanṯel mondiki/e ’pen ’koshkina um jwa mo jin ’de’kkin ma Arumgimis ’peni mowu mo tani ana ’baar mo tana iman/o gwo gom a’di mo.

¹⁶Dhali ki moŋgam gway piti is mo tani gway piti ki ’bi’th wathi/ yan is mo jin hila um mo dhali jin mishkina um mo. Nye, moŋgam gwo is jin di’d e a’di mo tani a’di ki c̱i a’di isa ’borgaŋ gana/ yansan ibwambori umi ’baar mo.

¹⁷Dhali shwane/, ikam pem, aha/ misha ki a’di miikina um mo mmomolkina um to mo, me’d jin miikina um tap̱am bum si’da/ mo.

¹⁸Hili to gwansan kun ṯor ma Arumgimis nṯwa/a/ ki ’twa/ gi imanc̱i gwo ma Arumgimis kadhamo/ ’baar mo tani ka Ḵrisṯẖos piti mina isi mii ’kosh ka nyor mo tani a’di miikunu a’di wakan mo.

¹⁹Rici uma du is mo ma dhali ṯuka bor doḵ/e mo ki miinthus bum minu ’kosh mo, ki mii gi wakan mo ki mowac̱ midi p̱u’d mo ’peni bwambori Tap̱a mo be,

²⁰dhali ki a’di midi hasha Ḵrisṯẖos jin karkunu mo gom um mo, a’di jin ta’da Yesus mo,

²¹a’di jin mina momisi mii bu’th mo ntagi mo jin minu ṯela ris to ’baar mo shoka ’cesh doḵ/e mo, uni gun on ma Arumgimis ki ’twa/ gi imanc̱i gwo ma Arumgimis kadhamo/ mo kun dhunu ki she/ ki dhelel dhelel mo kun ’kokin ’peni isa dhamo/ innii mo.

²²Ka jiŋ gana/ aMusa oki gwo mo ki: Amanc̱i gwo ma Arumgimis mina Tap̱a Arumgimis piyu/ mo gom um ’peni bwam ikam bum mo jin midi wa e ki aha/ mo. A’di mina umi ciḵ to ’baar mo ki ’beles kun mina a’di o um mo.

²³Dhali a’di midi war ka ris ’kwani ’baar ki ’beles kun mini ’koki ciḵ gwo ma manc̱i gwo ma Arumgimis yan mo tani uni minu ’ce’d shoki ’baar mo ki ’bil ’bil ’peni bwaŋ ’kwani mo.

²⁴Nye dhali aris imanc̱i gwo ma Arumgimis kadhamo/ mo ’pena Samu/iil mo dhali uni kun baṯẖani ’ko’d tani aris uni ’baar mo kun oki gwo mo tani uni si’da/ ṯorki gwo mo goma cim gwansan mo be.

²⁵Um ta iya/ gi imanc̱i gwo ma Arumgimis kadhamo/ mo dhali gwo jin gamu me’d jin on ma Arumgimis is ki ibabam bum mo mmo/owa Ibrahiim gwo ’bil ’penimo ki: Dhali e emen pini mo tani arisa waḵi ’baar mo kun ’kon e mony’cesh yansan mo tani uni minu ’bor mii mo be.