GWAY GI IDAWUU’D 89:29-49

²⁹Aha/ mina ṯel jil piti sho’k ki sule/ sule/ mo dhali aḵursi ma maliḵ piti mina e wa ka tee gi momis mo.

³⁰Waḵki/ uc̱im piti mini dhal gwoŋḵan pem jin c̱inu ’pen mo dhali ’koki ii isi me’d gwoŋḵan kun onu mo tani,

³¹dhali waḵki/ uni ki p̱uu gwoŋḵan pem kun bahu mo dhali ’koki dhu gwoŋḵan pem kun ’kwarkunu mo tani

³²yan’ko’d aha/ mina c̱i uni ajisa gom gwondhaŋ buni ki cwam pem mo dhali miinthus buni ki gulu’c jin miga/ dor uni mo.

³³Hili aha/ mina joc̱ mo/en pem jin ṯelu sho’k ’peni a’di yisa, walla aha/ mina ta thus gom mii ma isiŋ ganam pem yisa.

³⁴Aha/ mina diki p̱uu gwo jin gamka/ me’d mo walla aḵ gwo e mo jin piyi’d ’peni ’twam pem mo.

³⁵Me’d ’de/ ki sule/ aha/ okina gwo isi ’baar mo mmothul gwo me’da p̱o/ gom mondhelel pem mo. Dhali aha/ mina diki ta aṯor goma Dawuu’d mo.

³⁶Jil piti midi ’dim ’kup̱ ki sule/ sule/ mo, dhali aḵursi ma maliḵ piti midi di ki sule/ me’da tente/ ibwambori jis/em pem mo.

³⁷Me’da ppe mo tani a’di midi ṯel sho’k ki sule/ sule/ mo. A’di midi dosh ki morwa’c is mo ki momis ’kon mmo’dim ’kup̱ mo. Doshi ma dhali ’cunycuri yan mo.

³⁸Hili shwane/ /e biṯkina biṯa sho mo dhali ruḵa/ ruḵ mo. /E ’tu’dkunu mo ka nyor ap̱o/ a’dim pini jin ’koshkunu ki monyca mo.

³⁹/E waṯki gwom pini jin gamu me’d mo gi c̱iŋkinam pini mo. /E ki shi/ toŋ’kup̱ piti is e bu’da’cesh mo.

⁴⁰/E ki yu’d agoŋ piti mo. /E ki kar mom piti jin ṯenu gwo mmokup̱ mo.

⁴¹Aris uni gwansan kun pekin mo uni dilki a’di to mo. A’di c̱ikunu gura/ ki imannyaḵ ’kom piti mo.

⁴²/E ki kar me’da bim poros gi a’di jin ta ’kup̱ ki a’di ki ca mo. /E ki dhuwa ris uni gun ta ’kup̱ ki a’di mmo’kuny bwa mo.

⁴³Nye, /e ki doḵ shemen gandal piti jin kaaka ka nyaŋ’ko’d mo. Dhali /e diki kar a’di mmodosh mo e mo ma mee mo.

⁴⁴/E ki joc̱ cwa ma maliḵ ’peni me’d piti mo dhali /e ki biṯa ḵursi ma maliḵ piti a’cesh mo.

⁴⁵/E ki kara teem piti ki kuṯ kuṯ mo ateem piti jin tana a’di dhuru’c mo. /E ki tash a’di is ki mo ma ’the is mo. Doshi ma dhali ’cunycuri yan mo.

⁴⁶Ki mo gi wakata, ayy Tap̱a, imina /e bag is pini ki sule/ sule/ kan mo? Ki mo gi wakata, imin ma nyor pini pur me’d o’d kan mo?

⁴⁷Kayi gwo e mo ma, ayy Tap̱a, mondiki/e wana bar piti kata mo? Dina /e ki p̱ar e mom pini jin uḵa /e to di bwa ’te/ goma ris iya/ gi ’kwani mo?

⁴⁸Wathi/ jana sa/ imidi di ki e mmodiki p̱ar wu e mo? Dhali kaja si’da/ imidi misha ḵashiram piti woṯẖ ’peni mom’bi’th ma Haawiya mo? Doshi ma dhali ’cunycuri yan mo.

⁴⁹Tap̱a, mane mo/en pinin dhamo/ yin jin ṯelu sho’k mo, a’di jin tana /e isiŋ gana/ a’di jin thulkina /e aDawuu’d gwo me’da p̱o/ mo?