GWAY GI IDAWUU’D 89:19-37

¹⁹Haali/ ’pena dhamo/ mo tani /e ṯorki gwo ki tonyjan mo ki a’dim pinin ’de/ jin ta isiŋ gana/ mo dhali o a’di gwo mo ki: Aha/ karkina toŋ’kup̱ ’dolkon ap̱o/ jan ’de/ a’di jin c̱a’bki dem dem mo, dhali aha/ karkina a’di ki ca, a’din ṯal ’de/ yan jin kwanyu/ mo ’peni ’kwani mo.

²⁰Aha/ gamkina Dawuu’d mo a’di jin ta c̱iŋkinam pem mo. Ka yin pem jin ḵogu mo tani aha/ ki ’koshki a’di mo.

²¹Wakan me’d pem midi diya p̱o/ a’di ki sule/ sule/ mo. Abim pem si’da/ midi ’bi’th a’di is mo.

²²Uni gun ta ’kup̱ ki a’di mo tani uni mini ’koki p̱i a’di e ki yuḵ mo. Uni gun ta thus ki thus mini ’koki kar a’di mo mmokar is ki gwa’d mo.

²³Aha/ mina siri’c uni gun ta ’kup̱ ki a’di ki sho’k ibwambori a’di mo. dhali dher uni gwahan is bwa ka ’cesh mo uni gun shi/ki a’di i e mo.

²⁴Mii ma isiŋ ganam pem dhali mo/en pem jin ṯelu sho’k mo tani uni mini nyaḵ ’ko ki a’di mo be, dhali ki gway pem mo tani cem piti minu kar ki ca mo.

²⁵Aha/ mina kar me’d piti ap̱o/ ḵumma/ yi’de/ mo dhali me’da bim poros piti ap̱o/ yi’de/ kun son mo.

²⁶A’di midi ’ther ko e aha/ mo dhali o gwo mo ki: /E tana Ababam pem mo, jin ta’da Arumgimis pem mo, dhali Wosh jin ta bway mowoṯẖ pem mo.

²⁷Dhali aha/ mina kar a’di mmota abwanyara/ mo, a’di jin eḵa/ eḵ mmobol imaliḵ gi mony’cesh e mo.

²⁸Mo/en pem jin ṯelu sho’k mo tani aha/ mina karki a’di gom a’di ki sule/ sule/ mo. Dhali gwom pem jin gamka/ me’d mo midi dosh mmorwa’ckunu a’di gom a’di mo.

²⁹Aha/ mina ṯel jil piti sho’k ki sule/ sule/ mo dhali aḵursi ma maliḵ piti mina e wa ka tee gi momis mo.

³⁰Waḵki/ uc̱im piti mini dhal gwoŋḵan pem jin c̱inu ’pen mo dhali ’koki ii isi me’d gwoŋḵan kun onu mo tani,

³¹dhali waḵki/ uni ki p̱uu gwoŋḵan pem kun bahu mo dhali ’koki dhu gwoŋḵan pem kun ’kwarkunu mo tani

³²yan’ko’d aha/ mina c̱i uni ajisa gom gwondhaŋ buni ki cwam pem mo dhali miinthus buni ki gulu’c jin miga/ dor uni mo.

³³Hili aha/ mina joc̱ mo/en pem jin ṯelu sho’k ’peni a’di yisa, walla aha/ mina ta thus gom mii ma isiŋ ganam pem yisa.

³⁴Aha/ mina diki p̱uu gwo jin gamka/ me’d mo walla aḵ gwo e mo jin piyi’d ’peni ’twam pem mo.

³⁵Me’d ’de/ ki sule/ aha/ okina gwo isi ’baar mo mmothul gwo me’da p̱o/ gom mondhelel pem mo. Dhali aha/ mina diki ta aṯor goma Dawuu’d mo.

³⁶Jil piti midi ’dim ’kup̱ ki sule/ sule/ mo, dhali aḵursi ma maliḵ piti midi di ki sule/ me’da tente/ ibwambori jis/em pem mo.

³⁷Me’da ppe mo tani a’di midi ṯel sho’k ki sule/ sule/ mo. A’di midi dosh ki morwa’c is mo ki momis ’kon mmo’dim ’kup̱ mo. Doshi ma dhali ’cunycuri yan mo.