GWAY GI IDAWUU’D 88:5-18

⁵dhali mmowa e ki a’di jin dhalkunu ’pen e bwaman jwa mo, dhali wa e ki wathi/ jin ’koshkunu mmo/ish e jis jwa mo, dhali wa e ki uni gwansan kun dina /e ki ka e doḵ/e mo, haali/ uni ’ciṯẖkunu ’twa/ mo ’peni me’d pini mo.

⁶/E karki aha/ e jisa ’kulga/ mo, dhali e pa gi mondhurumi’d dhali moŋ’kulga/ mo.

⁷Anyor pini ishki’da p̱o/ aha/ ki diṯ diṯ mo, dhali /e kumki aha/ ’twa/a ’cesh ka ris mii gi lanthinem pini mo. Doshi ma dhali ’cunycuri yan mo.

⁸/E ki raḵ uni gun nyaḵ ii ki aha/ mmogas aha/ mo. /E ki kar aha/ mmota to jin bulabul gom uni mo. Aha/ mu’thkunu ’twaŋkal e bwaman mo wakan ki aha/ mina mol ye mo.

⁹Em pem caki’d mo mmoḵala ’tum gom bwan diṯi’d mo. Isa yempa/ aha/ yuḵkina /e mo, ayy Tap̱a. Aha/ ṯe’dkina me’d pem gom /e mo.

¹⁰A/e mii miimer gom uni gun wukina? A/dhali kun iikin mo mini cu mis mo mmomaŋ /eya? Doshi ma dhali ’cunycuri yan mo.

¹¹A/mo/en pini jin ṯelu sho’k bahu e jis jwa mowa? Walla dhali mo ma isiŋ ganam pini e mo jin kup̱u mowa?

¹²A/momer pini mishu e mondhurumi’d mowa? Walla a/mo jin tana /e is ki me’d mmowoṯẖ ’kwani e mony’cesh jin dhaluwa dhal ’pen mishu mowa?

¹³Hili aha/, ayy Tap̱a, gwokina ’twa/ e /e mo. E mon’thamo/ a’thom pem yaki’di bwambori /e mo.

¹⁴Ayy Tap̱a, atinta ibiṯa /e aha/ asho kan mo? Atinta baga /e jis/em pini ’peni aha/ mo?

¹⁵Mo jin jwakaṯkunuwa du mo dhali mowu ’dishki aha/ is mo ’pena tee jin taka/ dhuru’c mo, aha/ ’koshu is ka nyor goma purem pini mo. Aha/ dara gi mowoṯẖ mo.

¹⁶Anyor pini a’di dhi’thki aha/ sho’k mo. To jin ḵo/ka/ is ’peni /e uni bu’thkina bu’th mmo’ce’d aha/ sho’k mo.

¹⁷Uni ’kamki aha/ is me’da gannu/ yi’de/ jin guski’d ka tee ’baar mo. Uni ’kamki aha/ ’kup̱ ki deḵi monṯal ’de/ mo.

¹⁸/E ki raḵ uni gun eni aha/ dhali imugum pem mmogas aha/ mo. Imannyaḵ ’kom pem uni ’kon e mondhurumi’d mo.