GWAY GI IDAWUU’D 72:5-14

⁵Dhalki a’di di’d ki e mo ka tente/ di’di motim ’kup̱ naskina/ mo, dhali me’d jin din ma ppe naskina/ gara/ mo, eya risa nyaḵum yil gi ’kwani mo.

⁶Dhalki a’di wana e ka sho’k jin wolki yi’dem piti asho jin ’punyu/ mo, me’da sho’k jin mii yi’de/ ki puya/ puya/ ap̱owa ’cesh mo.

⁷Eya teem piti jin dina a’di ki e mo tani dhalki mo ma ḵar/e ’twaḵa’d mo, dhali moŋḵu’th is mmo/ish mo ntaga ppe midi diki di doḵ/e mo.

⁸Dhalki a’di ta gi mom’bi’th ’peni ḵumma/ yi’de/ mo ntagi ḵumma/ yi’den tiya mo, dhali ’peni yi’de/ kun sokin mo ita gi ’pemen gi mony’cesh mo.

⁹Dhalki uni gun ta ’kup̱ ki a’di luŋkini bwambori a’di mo, dhali ’kwani kun ta ’kup̱ ki a’di mini ’biṯṯ bu’da’cesh mo.

¹⁰Dhalki imaliḵ gi Pan Tarshiish dhali kum pa uḵa ’cesh mo c̱i a’diya thulp̱a/ mo, dhali imaliḵ gi Pan Shaba mo dhali Pan Saba mo ḵal to kun c̱inu ki me’d gom a’di mo.

¹¹Dhalki aris imaliḵi ’baar mo ṯagkina ’cesh ki jiŋ ’kup̱a’dup̱uni bwambori a’di mo, dhali dhalka ris kal gi ’kwaniny’cesh si’da/ mii a’di to mo.

¹²Haali/ a’di ’cuḵki uni gun mini mii ta gi to mo, ki a’di yuḵki’da yuḵ mo, a’di jin hatha’ko’d mo dhali a’di jin dar gi wathi/ mmowoṯẖ a’di mo.

¹³A’di ki hila hil ki e ma ’thime/ ki mo/en ap̱o/ uni gun ’ka’da is mo dhali ap̱o/ uni gun mini mii ta gi to mo, dhali ta moŋ’koki/em buni is ki me’d mo gom uni gun mini mii ta gi to mo.

¹⁴’Peni mo jin sirijuwa siri’c ki sho’k mo dhali abujur jin bujuru mo tani a’di wanki moŋ’koki/em buni ’ba/ mo, dhala bas buni ta yinthoŋ gana/ e jis/em piti mo.