GWAY GI IDAWUU’D 69:3-22

³Aha/ wukina is e gom kom pem mo, dhali ’kus pem dhere’di ’baar mo. Dhali em pem ’ceṯẖki’da ’tum kagahara mo mmowu e ’kup̱ mmoc̱ora Arumgimis mo.

⁴Mmobola mur ’kup̱ pem e mo tani uni ta uni gwansan kun shi/ki aha/ e mo ki dar gi miiŋ kamu/ mo. Uni gwansan c̱a’bki dem dem mo kun mini ’ce’d aha/ sho’k moyi, uni gwansan kun mini bu’th aha/ ki gwo ma ṯor mo. A’di jin dika/ ki ḵwal naskina/ mo tani aha/ mina mii doḵ a’di ka nyaŋ’ko’d mowa?

⁵Ayy Arumgimis, /e mishki mii ma p̱alim pem mo. Mii gun ṯẖu’thka/ mii mo tani ’konuki bag ’peni /e mo be.

⁶Dhalku/ ki dhal uni gwansan bway kun tan gi mo ma ’teŋ kap̱e/ e /e mo dhunu ki mo ma ’the is gom aha/ mo, ayy Tap̱a Arumgimis gi momis mo. Dhalku/ ki dhal uni gwansan bway kun simmki /e e mo jin minu ’doyu/ uni e mo jin minu this uni taḵ gom aha/ mo, ayy Arumgimis ma Israyiil mo.

⁷Haali/ a’di gom gway pini mo tani aha/ ḵalkina mo jin waḵuwa waḵ mo, dhali mon’the is a’di kumki aha/ bwam/em pem mo.

⁸Aha/ wara ki wathi/ gi bampaŋ kamu/ e bwaman ’kwani ma waḵ pem mo, mmota a’di gi paŋ kamu/ e bwaman iya/ ma ta’da mo.

⁹Haala nyor gom gu’b pini a’di shwakaa/ mo, dhali asor gi uni gwansan kun sorki /e mo tani ṯa’kkina p̱o/ aha/ mo.

¹⁰Ki aha/ karkina is pem ki gwa’d mo eya ḵashiram pem ki moŋga/ to mo tani a’di warki’d ki mowaḵ pem mo.

¹¹Ki aha/ hi’thkina burrinye/ ma shawaal e is mmota burrinye/ gom is pem mo tani, aha/ warkina ki a’di jin miikina uni ka maḵ mo.

¹²Aha/ tana a’di jin ṯora uni gwansana ṯor kun ’kon e ’twaŋkala goŋ mo dhali uni kun ’koshkin ma su mo tani yuḵki gway gom aha/ mo.

¹³Hili gom aha/ mo a’thom pem jin ’thoka/ mo tani e /e mo be, ayy Tap̱a. Eya tente/ jin mishuwa bu’th bu’th mo, ayy Arumgimis, dhali e mo/ish jin isha mo/en pini jin ṯelu sho’k mo tani /e ’thoḵki aha/ ’twa/ mo.

¹⁴Ki mowoṯẖ pini jin ta isiŋ gana/ mo tani ’cwami aha/ mo ’peni boro’th jin loski aha/ mo. Dhalki aha/ ’cuḵu mo ’peni ’kwani kun ta ’kup̱ ki aha/ mo dhali ’peni yi’de/ kun ’kula’kul kun shwana nyor mo.

¹⁵Dhalku/ ki dhala gannu/ yi’de/ bway mo mmodhi’th aha/ sho’k mo, walla moŋ’kul piti mmolos aha/ mo, walla jisa ’kulga/ mmomu’th ’twa/ ap̱o/ aha/ mo.

¹⁶’Thoḵi aha/ ’twa/ mo ma ayy Tap̱a, haali/ mo/en pini jin ṯelu sho’k mo a’di ’bora’bor mo be. Isi ki gwo gi momiimiim pini jin ishki’d ka enthus mo tani ṯu’kki/ aha/ is mo.

¹⁷Dhalku/ ki bag jis/em pini ’peni c̱iŋkinam pini mo. Haali/ aha/ dina e mo ma c̱is mo tani huru/ ki jahanne/ mo mmo’thoḵ aha/ ’twa/ mo.

¹⁸’Dishi aha/ is mo dhali wani aha/ ’ba/ mo, dhali kari aha/ ki ’kus ’peni ’kwani kun ta ’kup̱ ki aha/ mo.

¹⁹/E mishi mowaḵ pem jin waḵu aha/ mo, dhali mo ma ’the is pem mo dhali mo jin ’konuki taḵ aha/ mo. Aris uni gun ta ’kup̱ ki aha/ misha /e mo.

²⁰Asor ’ce’dkina dum pem bwa mo, wakan a’di itaka/ buṯkan ki buṯkan mo. Aha/ ŋap̱a mo jin minu ’taki hil aha/ ki mo ma ’thime/ ki mo/en mo tani hili aha/ gama wathiŋ kamu/ yisa. Dhali aha/ ŋap̱a ’kwani mmo’taki malas aha/ mo tani, hili aha/ dinaki gam jaŋ kamu/ mo.

²¹Uni c̱iki aha/ aṯi’d tonthus e tonṯe/ mo, dhali gom yi’de/ jin bu’thki aha/ mo tani uni c̱iki aha/ yiman tom’pac̱a’d mmop̱i mo be.

²²Dhalki tonṯem buni jin shwana uni atharabeesa mo warki’d ka gume/ ibwambori uni mo. Dhalki tom buni kun ’ciṯẖu/ ’kus mmomiiya bas goma yuḵ jin yuḵu ka tul ’kup̱ mo warki’d ka gume/ mo.