GWAY GI IDAWUU’D 68:13-28

¹³ba uni nyaḵ ’ko ki ḵa’bal e bwam ma goŋ mo, dhala biŋ gurko/ uni ’koshkunu is ki ’dolkon kush mo dhali jeshem piti c̱a’b ki go’d go’d me’d ’dolkona go’d go’d mo.

¹⁴Ki a’di jin ta gi Mom’bi’th ma Dem Dem c̱ekerki imaliḵ bwa mo tani awasa/ p̱u’dki’d ap̱o/ Wosha Salmuun mo.

¹⁵Ayy, wosh jin turatur jin c̱a’bki dem dem mo, jin ta wosha turga/ gi Pam Bashan mo. Ayy wosha turga/ jin ’kana ’kup̱ ki bidhi/ bidhi/ ka ris mo, jin ta wosha turga/ gi Pam Bashan mo.

¹⁶Ata hila /e mo ki en dhap̱an kan mo, ayy, wosha turga/ jin ’kana ’kup̱ ki bidhi/ bidhi/ ka ris mo, e ’kuwosh jin on ma Arumgimis bwa mo mmota mom piti mmoc̱a’bi cine/ mo? Nye, mo jin mina Tap̱a c̱a’b ki sule/ sule/ mo.

¹⁷Ki mom’bi’th ma ris shumarum kun tana dem dem mo kun ta iss ’kwanimpa ka iss ’de/ ka alip̱ mo, dhala alaap̱a p̱owa alaap̱ mo, Tap̱a pu’dki’d ’peni ’kuwosha Sinaa/ e mo jin ḵogu mo.

¹⁸/E ki poḵ wosh jin turatur mo, dhali /e ki shu uni bway uni gun bu’thkunu mo e bway pini jin yana /e mo, dhali bu’th to kun c̱inu ki me’d e bwaŋ ’kwani mo, isi kan e bwaŋ ’kwani kun pishi is ka le’d mo, wakan ki Tap̱a Arumgimis midi di e mo yan mo be.

¹⁹Mom’bor mii midi di gom Tap̱a mo, a’di jin ’de’kki ana abor ki mis isa yempa/ mo. Arumgimis a’di ta bway gi mowoṯẖ bana mo. Doshi ma dhali ’cunycuri yan mo.

²⁰Arumgimis bana a’di ta’da Arumgimis gi bway gi mowoṯẖ mo. Dhali eya Arumgimis mo tani, a’di ta Tap̱a jin cila mo jin yenu ’peni mowu mo.

²¹Hili Arumgimis midi pwaṯẖ ’kup̱ gi uni kun ta ’kup̱ ki a’di mo, dhali ayinyjwa gi ’kup̱ gi a’di jin ya’d e bway piti jin dina mii a’di i’ba/ mo.

²²Tap̱a o gwo mo ki: Aha/ mina doḵ uni ka nyaŋ’ko’d ’peni Pam Bashan mo, dhali aha/ mina doḵ uni ka nyaŋ’ko’d ’peni ḵumma/ yi’de/ jin ’kula’kul mo

²³ki um mini lam sho’k bum ka bas mo, dhali ka le’d ma ’kam bum mo tani uni mini ta gi tonṯe/ ’peni ’kwani gi ’kup̱ bum mo.

²⁴Yam pini kun ḵogu kun yana /e mo tani mishu mo, ayy Arumgimis, a’di jin ta ya ma Arumgimis pem mo, a’di jin ta’da Maliḵ pem mo, e mo jin ḵogu mo,

²⁵imanyuḵ gway kun iina bori a’di mo, dhali uni kun buḵina dheŋdhenye/ iini ’ko’d mo dhali bwaman uni mo tani nyara/ p̱ina dheŋdhenyem buni ki me’d mo.

²⁶’Bori Arumgimis mii e dhana tul ’kup̱ gi ’kwani mo, Tap̱a, ayy um ’kwani kun ta uc̱i ma Israyiil kun kasha e mo.

²⁷’Pena waḵ ma Benyamiin, a’di jin p̱iski’d e bwaman uni, jin shu’da shu/um bway mo, e bwaman gi iya/ gi ’Kwani Yahuuda/ eya waambuhany buni mo, dhali e iya/ gi ’Kwani gi Pan Sabulun mo, dhali e iya/ gi ’Kwani gi Pa Nap̱taali mo.

²⁸Tilu mom’bi’th ma dem dem pini is mo, ayy Arumgimis. Ṯori mom’bi’th pini mo, ayy Arumgimis, /e jin wagaski a’di gom am mo.