GWAY GI IDAWUU’D 49:2-12

²um gun gwa’da is mo dhali um gun ’bap̱kin mo, dhali kun ta pa ki pa mo dhali kun hatha’do’d si’da/ mmonṯal ’de/ mo.

³’Twa/ pem midi ṯor gwo gom moyuḵ mo. Dhali gwom pem jin kulumka/ eya du mo tani minu mish ’ban mo be.

⁴Aha/ mina ḵa’d ’cem pem ki gwom ’bi’th/e mo. Aha/ mina gam gwom pem jin ’ce’dka/ agagala/ mo ki ko ma dheŋdhenye/ jin ’kon ma shu/i pesu/ mo.

⁵Ki gomatinta imiga/ ḵo/ is goma risa tente/ kun ṯoju aha/ bwa mo, ki imanmii tonthus kun ṯoci aha/ ’kus mo tani ’kamki aha/ mo?

⁶Uni gun ta ’kwaniŋ gwaṯẖ kun ’ko ki ’kus gom tom buni kun tana uni mo dhali dhu ’ba/ ki ca gom tom buni kun tana uni kun ishkin ka enthus ki pa jin tana uni mo?

⁷Ka jiŋ gana/ wathiŋ kamu/ p̱iyi’d jin midi wan is piti ’ba/ mo, walla c̱iya Arumgimis she/ yol gom mondiki/em piti mo,

⁸haali/ mo jin wanu ’ba/ gom mondiki/em piti mo tani a’di ’bitha yol she/ ki ’bi’th mo, dhali midi mol gam ki sule/ sule/ mo,

⁹ki a’di midi ’taki ṯikir di ki e ki sule/ sule/ mo, dhali mol jisa ’kulga/ p̱ar e mo.

¹⁰Nye, a’di midi p̱ar e ka jiŋ gana/ ki isi ’kwani kun yuḵayuḵ wukin mo, uni gun ta p̱us dhali uni gun dar gi bwaŋ’kup̱ mo tani uni mini mii inyaḵ ’ce’d sho’k imonṯal ’de/ mo dhali dhal tom buni kun tana uni pa ki pa ki unin tiya mo be.

¹¹Jis jwam buni mo tani a’di ta pam buni jin mina uni ’ko ki sule/ sule/ mo, a’di jin ta mo jin mina uni i’ko nyaḵka ris ’kwani ma nyaḵum yil buni mo, ba uni ṯoshki yuḵa ’cesh gway ki jim buni mo.

¹²Wathi/ mol c̱a’b ki e e ’penkap̱an piti jin tana a’di mo, a’di wana e ki tonycuḵ kun ’ce’dki sho’k mo.