GWAY GI IDAWUU’D 44:3-14

³Haali/ a’di ki gandal buni yisa igamkina uniya ’cesh yan adu is mo yisa, walla si’da/ abim buni diki c̱i uni mom’bi’th mo, hili me’da bim poros pini mo dhali abim pini mo, dhali moŋkush ’peni bwam/em pini jin kushki mo mo, haali/ /e ’kunykina bwa e uni mo be.

⁴/E tana Maliḵ pem mo dhali Arumgimis pem mo, a’di jin ’kawurki’da ’kawur mo gom momp̱inu mii e ma Yakuub mo.

⁵Ki /e mo tani am ki ṯan uni kun ta ’kup̱ bam ka bor mo. Dhali ki gway pini mo tani am ki yap̱ uni gwahan ki sho’k mo kun gam am ’kup̱ mmo/as mo.

⁶Haali/ bwam pem mo tani aha/ dinaki gam gwo is gom a’di mo, walla gandal pem si’da/ diki ta aha/ is ki me’d mo.

⁷Hili /e woṯẖki aman mo ’peni uni kun ta ’kup̱ ki am mo, dhali kar to ibwaman uni kun shi/i aman i e mo jin midi duŋgur uni ’kup̱ ’kup̱ is mo.

⁸Eya Arumgimis mo tani aman dhukina ’ba/ ki ca ki ṯikir ṯikir mo, dhali aman mina c̱i /e momaŋ gom gway pini ki sule/ sule/ mo. Doshi ma dhali ’cunycuri yan mo.

⁹Hili /e ki ṯa’k am ka pije/ mo dhali dhu am ki mondhu is ki gwa’d mo, dhali /e diki ya ka pije/ nyaḵki ’kwani ma meem bam mo.

¹⁰/E ki dhu am mmodoḵ ka nyaŋ’ko’d mo ’peni uni gun ’kwar am ka gwap̱i/ mo. Dhali uni kun ta ’kup̱ ki am mo tani dilki aman to mo.

¹¹/E ki dhu am me’d ḵa’bal kun minu ’ciṯẖ ’kus mo, dhali /e ki c̱eker aman bwa mo e bwaman kal gi ’kwaniny’ceshi ’baar mo.

¹²/E ki yol ’kwanim pini ka maliim gana/ mo, /e ki ḵan gwo ki uni minu ’koki yol ka thaman kun caaca mo.

¹³/E ki dhu am ki uni gun nyaḵ ’ko ki am mmoc̱i aman gura/ mo, dhali aman dup̱u i e dhali ṯẖuny ’twa/ i is ki uni gwansan kun ’kamki am is mo.

¹⁴Dhali /e ki dhu am ki ku gun miinu mii ka maḵ mo e bwaman kal gi ’kwaniny’cesh mo. dhali aman p̱e’thkunu mmopir ’kup̱i is e bwaman ’kwaniny’cesh mo.