GWAY GI IDAWUU’D 41:2-12

²Tap̱a woṯẖki a’di mo dhali kar a’di ki e mo. A’di yuḵu gway ka man’boru mii e mony’cesh mo. /E diki c̱i a’di e bwa gi uni gun ta ’kup̱ ki a’di mo.

³Tap̱a a’di thip̱ a’di ’ko’da cim piti jin isha a’di mmo’ba’th mo. E mom’ba’th piti mo tani a’di ki wac̱ a’di ’pena ris isa nyor kun ’koshki a’di mo.

⁴Gom aha/ mo tani, aha/ ona gwo mo ki: Ayy Tap̱a, miiyi mii ma ’the gom aha/ mo ma. Dhali wac̱i aha/ mo, haali/ aha/ miikina miinthusa p̱o/ /e mo be.

⁵Uni gun ta ’kup̱ ki aha/ mo o gwo e aha/ eya adun dup̱ buni mo ki: Kakasja imina a’di iwu mo? dhali gway piti ki ’ce’d sho’k mo?

⁶Dhali ki jan ṯal ’deŋ kamu/ p̱u’dki’d mmop̱ar aha/ e mo tani a’di ki bah gwo kun ’kon isi bwa ’te/ mo, ka yiha/ ka dum piti tulu’da ris mii ma pibi is mo. Ki a’di ya’d ka pije/ mo tani a’di ki wagar gwo mo.

⁷Aris uni gwansan kun shi/ki aha/ i e mo tani ṯorkina ṯor ki ḵako/ mmonṯal ’de/ gom aha/ mo. Uni ki gwalal buni mo tani uni kulumki gwo shi/in ibwa gom aha/ mo, kun bol tiya e mo.

⁸Uni ki o gwo mo ki, To jin wunu ḵara biṯi’da p̱o/ a’di ba/. A’di midi cu mis doḵ/eya? ma ’peni mo jin isha a’di mo.

⁹Isi kani amugum pem gana/ jin di’da bori aha/ jin gamka/ gwo is mo tani a’di jin shwaki tonṯem pem mo tani a’di ’de’kki ’penaṯiŋkilam piti ap̱o/ aha/ mo.

¹⁰Hili /e ayy Tap̱a, miiyi mii ma ’the ap̱o/ aha/ mo, dhali ’deki aha/ ki mis mo ki aha/ mina ’taki mu’th uni ’twa/ mo.

¹¹Gom mii yansan mo tani aha/ misha ki /e ’bora bwa ki aha/ mo, ki a’di jin ta ’kup̱ ki aha/ mo tani diki p̱i aha/ e mo be.

¹²Hili /e bu’thki aha/ mo gom miim pem jin dar gi ŋadhum mo, dhali /e ki kar aha/ e buŋ’kus pini ki sule/ sule/ mo.