GWAY GI IDAWUU’D 18:14-39

¹⁴Dhali a’di shinki’da thop̱am piti mo dhali c̱e uni bwa mo dhali a’di ki dhi’th mo ka war mo dhali ṯi’k uni ’pen mo.

¹⁵Dhali bway tur e ḵumma/ yi’de/ mo tani uni ’kokunu mo mmomish mo, dhali moŋḵa’b gi mony’cesh uni mishkunu mo be, gom miiŋ ḵucur pini mo jin ḵucurkina /eya ḵucur mo, ayy Tap̱a, gom du’d gi shi/in ’peni shush pini mo.

¹⁶A’di jidhirki’d ’peni mo jin eḵa/ eḵ mo, dhali a’di bu’thki aha/ mo, a’di ki dir aha/ ka pije/ ’pena ris yi’de/ mo.

¹⁷A’di ki ’cuḵ aha/ mo ’peni a’di jin ta ’kup̱ ki aha/ jin ’bitha’bi’th mo, dhali ’peni uni gwansan kun shi/ki aha/ i e mo, haali/ uni ’kona isi ’bitha gom aha/ mo.

¹⁸Uni p̱u’dkina p̱o/ aha/ ka teem pem jin ta joḵ ki joḵ mo, hili Tap̱a a’di ta mohal pem mo,

¹⁹A’di ki buḵ aha/ ka pije/ e mo jin ḵwashara/ ḵwashar mo dhali a’di ’cuḵki aha/ mo, haali/ a’di ’borkina bwa ki ’bor ki aha/ mo.

²⁰Tap̱a a’di c̱iki aha/ adum pem jin ish ḵumma/ mo me’d isi mii ma ḵar/em pem mo, dhali me’d isi mii jin dhelelkika/ me’d pem mo tani a’di raḵki aha/ to ibway mo.

²¹Haali/ aha/ dhukina bway gi Tap̱a mo dhali aha/ dinaki mii tonthus mmoper mo ’peni bway ma Arumgimis pem mo.

²²Haali/ aris gwoŋḵan piti kun onu mo tani uni ’koni bwambori aha/ mo, dhali gwoŋḵan piti kun bahu mo tani aha/ dinaki dhu uni ’pen ka pije/ ’peni aha/ mo.

²³Aha/ dara gi mii ’ba/ ibwambori a’di mo, dhali aha/ karkina is pem ’peni mo jin ’konu ki mii ’ba/ mo.

²⁴Gom gwo gi wakan mo tani Tap̱a a’di iraḵki aha/ to ibway mo isi ki mii ma ḵar/em pem mo, dhali isi ki me’d pem jin dhelelkika/ mo e jis/em piti mo be.

²⁵Gom uni kun ta ku isiŋ gana/ mo tani /e ki ṯor is pini jin tana /e a/isiŋ gana/ e uni mo, dhali ki wathi/ jin dar gi mii ’ba/ mo tani /e ki ṯor is pini jin dara /e ki mii ’ba/ e wathi/ mo.

²⁶Dhali gom uni kun dhelelkin mo tani /e ki ṯor is pini jin dhelelkina /e e uni mo, dhali ki uni kun wanycarkina ii ki wanyjar mo tani /e ki ṯor is pini e uni ki c̱a’ckon mo.

²⁷Haali/ /e ’cuḵki ’kwani kun dhu is ki gwa’d mo, hili uni kun dhu ’bam buni ki ca ki e ma waḵ mo tani /e mini thul uni ka ’cesh mo be.

²⁸Nye, /e ḵanyki moŋkush ma lambam pem mo. Tap̱a Arumgimis pem a’di ’twaḵki mondhurumi’d pem ki moŋkush mo.

²⁹Nye, ki /e mo tani aha/ misha sirica risa thuruḵ ma mee ki sho’k mo dhali ka Arumgimis pem mo tani aha/ mina mish nyalla/ ap̱o/ ’kup̱a gaŋgara/ mo.

³⁰Arumgimis yansan mo tani bway piti ’boro’d ki ’bor gana/ mo. Dhali gwo jin ona Tap̱a is mo tani a’di nyo/ki gwoŋ gana/ mo. A’di ta’da goŋgoro/ goma ris uni gwansan kun bu’thki mo jin huru jwa e a’di mo be.

³¹Haali/ aja a’di ta’da Arumgimis mo? hili a’di jin ta Tap̱a mo. Dhali aja a’di ita wosh? isi ciki/ Arumgimis bana mo.

³²Arumgimis jin deḵki aha/ ki mom’bi’th is mo, dhali kar bway pem ki ’dantar mo.

³³A’di ki kar sho’k pem mmowa e ki sho’k ma buyymo mo, dhali a’di ki kar aha/ ki kar ’pempaŋ gana/ mo e mo jin turatur mo.

³⁴A’di ṯorki me’d pem gwo mo gom mo ma mee mo, wakan ka bim pem mini mish gwana’da bwa me’da koroḵ mo.

³⁵/E c̱iki aha/ agoŋgoro/ gi bway mowoṯẖ pini mo, dhali ki me’da bim poros pini mo tani /e thip̱ki aha/ mo, dhali ki mowoṯẖ pini mo tani a’di ki kar aha/ mmocaaca mo.

³⁶/E ki c̱i aha/ mo jin waŋgala/ waŋgal gom ŋaṯgin pem kun dhuka/ e bwaŋ’kwariny pem mo, dhali sho’k pem diki yeres mo.

³⁷Aha/ urkina ris uni kun ta ’kup̱ gi aha/ isho’k mo, dhali bu’th uni mo dhali aha/ dinaki doḵ ka nyaŋ’ko’d mo ntagi uni kup̱kunu mo be.

³⁸Aha/ p̱uṯulkina uni i e mo, wakan ki uni molki cu mis mo. Uni ṯa’kkin e bwaŋ’kwariny sho’k pem mo.

³⁹Haali/ /e deḵki aha/ ki mom’bith mo gom mo ma mee mo. /E ki dhu uni kun tiḵki aha/ e mo mmocic̱ ki jorom mo ibwaŋ’kwariny aha/ mo.