GWAY GI IDAWUU’D 140:2-12

²uni kun thosonki tonthus is eya dum buni mo, dhali bir ’kwani mmo/asa mee ka yempa/ yempa/ mo.

³Uni dhuna le’d buni mmokaaka me’d tasha/ mo, dhali ’twa/ buni ’tu’dkin ka ṯi’d tashan ’thi/ mo. Doshi ma dhali ’cunycuri yan mo.

⁴Jiyi aha/ mo, ayy Tap̱a, ’peni me’d gi ’kwani kun ta thus ki thus mo. ’Tashi aha/ ’twa/ mo ’peni ’kwani kun bujurkina bujur mo, uni kun thosonki is mo mmoṯa’b aha/ ki sho’k mo.

⁵’Kwani kun dhu is ki ca mo mmo/ush gwoŋḵan mii mo tani uni bagkina gume/ gom aha/ mo, nyaḵka nyoḵa gume/ jin bere’thkina uni mo, e ’ko’d gwar bway mo tani uni ḵa’bkina gume/ gom aha/ mo. Doshi ma dhali ’cunycuri yan mo.

⁶Aha/ ona gwo e Tap̱a mo ki: /E tana Arumgimis pem mo. C̱iyi ’ce ki ’twa/ ki tom pem jin ’thoka/ ka di’b me’di is mo, ayy Tap̱a.

⁷Ayy Tap̱a, /e jin ta Tap̱am pem mo, dhali /e jin ta jim pem jin ’bitha’bi’th jin ’cuḵki aha/ mo, /e kumki aha/ ’kup̱ pem mo ka tee gi mo ma mee mo.

⁸Dhalku/ ki c̱i amanta thus ki thus to jin on ma dum piti a’di mo, ayy Tap̱a. Dhalku/ ki thoṯẖ tonthus piti jin miina a’diya wu’th ap̱o/ mo. Doshi ma dhali ’cunycuri yan mo.

⁹Uni gwansan kun ’kamki aha/ ki deḵ mo tani uni ’de’kki ’kup̱ buni mo. Dhalki ’twa/ buni kun tana pibi kumki uni ’twa/a ’cesh mo.

¹⁰Dhalki o’d jin ’thanu ka ’cila’th ṯa’kki’da p̱o/ uni mo. Dhalki uni ṯa’kkunu e jis jin ’kula’kul mo jin mina uni mol cuyu/ mis doḵ/e mo.

¹¹Dhalku/ ki dhala manthutha thu’th ’pen bway mo mmoṯel mii sho’k e mony’cesh mo. Dhalki tonthus wa’di wathi/ jin bujurki’da bujur ki jahanne/ mo.

¹²Aha/ misha Tap̱a halki mo jin wo’cki is she/ jin raḵki’d mo, dhali tor gwon dwall ’twa/a ’cesh ki mii ma ḵar/e gom uni gun mini mii ta gi to mo.