GWAY GI IDAWUU’D 119:72-106

⁷²Gwoŋḵan jin c̱inu ki ’twam pini mo tani a’di ’boro’d gom aha/ mo, mmobol ’dolkon gana/ ma alip̱ e mo dhali ’ku’kus ’dolkon kush mo.

⁷³Me’d pini a’di uḵki’da uḵ mo dhali /e c̱iki aha/ jamas mo. C̱iyi aha/ mo jin mishu gwo ’ban mo ki aha/ mina da/ar gwoŋḵan pini kun ’kwarkunu mo.

⁷⁴Uni gwansan kun ḵo/ki /e mo tani mini p̱ar aha/ e mo dhali ’kuny bwa mo haali/ aha/ tana gi mo ma ’teŋ kap̱e/ e gwom pini mo.

⁷⁵Aha/ misha, ayy Tap̱a, ki gwon dwall pini kun toru gwon dwall ’twa/a ’cesh mo tani uni tana ḵar/e mo dhali /e dorki aha/ ki isa nyor ki mii ma isiŋ ganam pini mo.

⁷⁶Dhalki mo/en pini jin ṯelu sho’k mo thoson is mo mmomalas aha/ mo isi ki gwom pini jin ona /e is gom c̱iŋkinam pini mo.

⁷⁷Dhalki momiimiim pini p̱u’du’d e aha/ mo ki aha/ mina di ki e mo, haali/ gwoŋḵan pini jin c̱inu mo tani a’di ta jim pem jin ’kunyka/ bwa mo.

⁷⁸Dhalki uni kun ushina ga/ ga/ mo tani idhunu ki mo ma ’the is mo haali/ uni ceshki aha/ ki gwo ma maḵ mo. Gom aha/ mo tani aha/ mina kulum gwo ibwa gom gwoŋḵan gi ’twam pini mo.

⁷⁹Dhalki uni gwansan kun ḵo/ /e mo tani ṯu’kkina bor ki aha/ mo, ki uni mini mish gwonyc̱im pini mo.

⁸⁰Dhalka dum pem a’di dar gi mii ’ba/ e gwoŋḵan pini kun bahu mo ki aha/ minu ’koki kar ki mo ma ’the is mo.

⁸¹Aḵashiram pem a’di gananki ’ba/ mo gom bway gi mowoṯẖ pini mo. Aha/ tana ga ’teŋ kap̱e/ gom gwom pini mo.

⁸²Em pem ushi me’d mo mmoc̱or /e gom gwom pini jin ona /e is mo. Aha/ doṯa gwo mo ki: Kakasja sa/ imina /e imalas aha/ mo?

⁸³Haali/ aha/ warkina ki ḵucaŋ gi yimana mura’th jin ’koshkin ma ku’d mo, hili aha/ dinaki ŋa gwoŋḵan pini kun bahu mo.

⁸⁴Ki mo gi wakatinta imina c̱iŋkinam pini i’dim ’kup̱ mo? Kakasja imina /e idwall uni gwansan gwo mo uni kun ṯo’c aha/ bwa mo?

⁸⁵’Kwani kun ushkina ga/ ga/ mo tani uni c̱wanyki jisa ’kulga/ gom aha/ mo jin miga/ biṯi cine/ mo, ’kwani kun ’konuki dosh shoka ’cesh gom gwoŋḵan pini jin c̱inu mo.

⁸⁶Aris gwoŋḵan pini kun ’kwarkunu mo tani uni shurkin mo. Uni ṯo’cki aha/ bwa ki gwo ma ṯor mo. Woṯẖi/ aha/ mo ma.

⁸⁷Uni ’dishi ’twa/ mo mmo’baar aha/ ’peni mony’cesh yan mo hili aha/ dinaki ŋa gwoŋḵan gi ’twam pini mo.

⁸⁸E mo/en pini jin ṯelu sho’k mo tani ’tashi mondiki/em pem ’twa/ mo ki aha/ mina dhu gwonyc̱im pini gi ’twam pini mo.

⁸⁹Gom ki sule/ sule/ mo tani, ayy Tap̱a, gwom pini a’di irwa’ckunu mo mmothosonkunu uni mo e momis mo.

⁹⁰Mii ma isiŋ ganam pini i’dimki ’kup̱ ki sule/ sule/ eya risa nyaḵum yil gi ’kwani mo. /E ṯelki mony’cesh sho’k mo dhali a’di doshki’d ki sho’k piti mo.

⁹¹Ki miim pini kun dhukina /e uni ’pen ka pije/ mo tani uni doshkin shwane/ mo. Haali/ aris to ’baar mo tani uni ta c̱iŋkinam pini mo.

⁹²Waḵki/ gwoŋḵan pini jin c̱inu midi ’taki diki ta jim pem jin ’kunyka/ bwa mo tani, aha/ minu ’taki ’ce’d sho’k e tom pem jin ṯocaa/ bwa mo.

⁹³Aha/ mina mol ŋa gwoŋḵan gi ’twam pini ki sule/ sule/ mo, haali/ ki uni mo tani /e c̱iki aha/ mondiki/e mo.

⁹⁴Aha/ tana jim pini mo. Tayi aha/ is ki me’d mo haali/ aha/ ŋap̱kina gwoŋḵan gi ’twam pini mo.

⁹⁵Imanmii tonthus ishkin mo dhali c̱ora/ c̱or mmo’ce’d aha/ sho’k mo, hili aha/ hila isi gwonyc̱im pini i e mo.

⁹⁶Aha/ hilkina gwayu/ gom a’di jin ha me’d ki isi haŋ gana/ ’baar mo, hili gwoŋḵan pini jin ’kwarkunu mo tani a’di ibeeyabee kagahara mo.

⁹⁷Ayy, gwoŋḵan pini jin c̱inu mo tani enka/ kata mo sa/. A’di ta gwom pem jin kulumka/ ibwa isa yempa/ mo.

⁹⁸Gwoŋḵan pini jin ’kwarkunu mo ikar aha/ mmoyuḵayuḵ kagahara mmobol ’kwani kun ta ’kup̱ ki aha/ e mo, haali/ a’di di’d nyaḵki aha/ isa yempa/ mo be.

⁹⁹Aha/ misha gwo ’ban kagahara mmobola ris uni kun ṯorki aha/ gwo e mo, haali/ gwonyc̱im pini a’di ta jim pem jin kulumka/ ibwa mo.

¹⁰⁰Aha/ mishkina gwo ’ban mo mmobol ’kwani kun cakin e mo, haali/ aha/ dhukina gwoŋḵan gi ’twam pini mo.

¹⁰¹Aha/ woṯẖa sho’k pem ’ba/ mo ’pena ris bway thus mo, gom mii gi wakan mo tani mmodhu gwom pini mo be.

¹⁰²Aha/ dinaki ṯu’k mo ’peni gwoŋḵan pini kun onu mo, haali/ /e ṯorki aha/ gwo mo be.

¹⁰³Gwom pini wana ’kuny kata si’da/ mmonyoḵka/ a’di mo. A’di c̱a’bki dhel dhel mmobola dham e e ’twam pem mo.

¹⁰⁴E gwoŋḵan gi ’twam pini mo tani a’di ibu’thkika/ mo jin mishu gwo ’ban mo. A’di ishi/kika/ aris bway thusi e wakan mo.

¹⁰⁵Gwom pini a’di ta’da lamba/ gom sho’k pem mo dhali moŋkush gom bway tur pem mo.

¹⁰⁶Aha/ thulkina gwo me’da p̱o/ mo dhali o gwo is mo dhali rwa’c a’di mo mmomii gwoŋḵan pini kun onu mo kun tana ḵar/e mo be.