GWAY GI IDAWUU’D 119:129-165

¹²⁹Gwonyc̱im pini uni ita jaro/ ki jaro/ mo. Wakan aḵashiram pem idhuki uni mo be.

¹³⁰Gwom pini kun ’ceenu mo tani uni c̱iki moŋkush mo. A’di c̱iki mo jin mishu gwo ’ban ki ’kwani kun tekela/ tekel mo.

¹³¹Ki ’twa/ jin ḵa’du/ mo tani aha/ miikina shir shir mo, haali/ aha/ ’koshkina ṯe/ gom gwoŋḵan pini kun ’kwarkunu mo.

¹³²Ṯuki /e ’kup̱ki aha/ mo dhali miiyi mii ka ’the gom aha/ mo, me’d jin boṯa /e ki miim pini ’kup̱ ki uni gwansan kun enki gway pini mo be.

¹³³Dhuyi sho’k pem dhali ŋaṯgin pem mmodosh ki seele/ mo isi ki gwom pini jin ona /e is mo, dhali dhalku/ ki dhal toŋ kamu/ jin ’coḵa’coḵ bway mo mmota tap̱a ap̱o/ aha/ mo.

¹³⁴Wani aha/ ’ba/ mo ’peni mo jin sirica ’kwani aha/ ap̱o/ ki sho’k mo, ki aha/ mina ’taki dhu gwoŋḵan gi ’twam pini mo.

¹³⁵Kari bwam/em pini mmokush mo mo ap̱o/ c̱iŋkinam pini mo, dhali ṯori aha/ gwo gom gwoŋḵan pini kun bahu mo.

¹³⁶Em pem yuki jabu’th ki haw haw mo haali/ ’kwani ’koki dhu gwoŋḵan pini jin c̱inu mo be.

¹³⁷Aḵar/e itana /e mo, ayy Tap̱a, dhali /e tana ḵar/e ki gwon dwall pini jin toru gwon dwall ’twa/a ’cesh mo.

¹³⁸/E dhuki gwonyc̱im pini ’pen ka pije/ mo e mii ma ḵar/e mo dhali eya ris mii ma isiŋ ganam pini mo.

¹³⁹Anyor pem shwaki aha/ mo haali/ uni kun ta ’kup̱ ki aha/ mo tani uni ŋaki gwom pini mo.

¹⁴⁰Gwom pini jin ona /e is mo tani a’di nyo/u ki nyo/ gana/ mo, dhali c̱iŋkinam pini enki a’di mo be.

¹⁴¹Aha/ gwa’da ki gwa’d mo dhali waḵkunu mo, hili aha/ dinaki ŋa gwoŋḵan gi ’twam pini mo.

¹⁴²Mii ma ḵar/em pini uni itana ḵar/e ki sule/ sule/ mo, dhali gwoŋḵan pini jin c̱inu mo tani a’di ita jiŋ gana/ mo.

¹⁴³Monṯo’c bwa dhali mo jin ’pe’du/ she/ mo uni p̱u’dkina p̱o/ aha/ mo, hili gwoŋḵan pini kun ’kwarkunu mo tani uni ita kum pem kun ’kunyka/ bwa mo.

¹⁴⁴Gwonyc̱im pini uni tana ḵar/e ki sule/ sule/ mo. C̱iyi aha/ mo jin mishu gwo ’ban mo ki aha/ mina di ki e mo.

¹⁴⁵Ka dum pemi ’baar mo tani aha/ gwokina mo. Thoḵi aha/ ’twa/ mo ma, ayy Tap̱a mo. Aha/ mina dhu gwoŋḵan pini kun bahu mo.

¹⁴⁶Aha/ gwona ’twa/ i /e mo. Tayi aha/ is ki me’d mo ki aha/ mina ’taki mii gwonyc̱im pini mo.

¹⁴⁷Aha/ cukina mis mmosul mon’twash/e bway mo dhali ko gom mowoṯẖ mo. Aha/ tana gi mo ma ’teŋ kap̱e/ e gwom pini mo.

¹⁴⁸Em pem di’d ki e ki wal wal mo mmotim mo gi mon’thiny ki mombwam/e mo ki aha/ mina ’taki kulum gwo ibwa gom gwom pini jin ona /e is mo.

¹⁴⁹Ciḵi ’twa/ pem mo e mo/en pini jin ṯelu sho’k mo, ayy Tap̱a, e mii ma ḵar/em pini mo tani ’tashi mondiki/em pem ’twa/ mo.

¹⁵⁰Uni pamki mo ki is ki ’dish ’dish mo uni gun ṯo’cki aha/ bwa mo ki to kun ta thus ki thus ’te/ ka kar ’kup̱ mo. Uni si’dasi’d ’peni gwoŋḵan pini jin c̱inu mo.

¹⁵¹Hili /e a’di i’disha’dish mo, ayy Tap̱a, dhali aris gwoŋḵan pini ’baar kun ’kwarkunu mo tani uni ta kuŋ gana/ mo be.

¹⁵²’Peni kadhamoonnii mo tani aha/ mishkina gwonyc̱im pini mo ki /e ḵa’bki uni ki sule/ sule/ mo.

¹⁵³Hili monṯo’c bwam pem mo dhali ’cuḵ aha/ mo haali/ aha/ dinaki ŋa gwoŋḵan pini jin c̱inu mo.

¹⁵⁴Woṯẖi/ gwo is gom tom pem jin raḵaa/ mo dhali wani aha/ ’ba/ mo. C̱iyi aha/ mondiki/e isi ki gwom pini jin ona /e is mo.

¹⁵⁵Bway gi mowoṯẖ a’di si’dasi’d ’peni a’di jin ta thus ki thus mo be haali/ uni ’koki simm gwoŋḵan pini kun bahu e mo.

¹⁵⁶Dhan momiimiim pini a’di caaca mo, ayy Tap̱a. C̱iyi aha/ mondiki/e isi ki gwo gi mii ma ḵar/em pini mo.

¹⁵⁷’Kwani tana ris ka ris kun ta imanṯo’c aha/ bwa mo dhali ta imanta ’kup̱ ki aha/ mo, hili aha/ dinaki gu is mo ’peni gwonyc̱im pini mo.

¹⁵⁸Aha/ hila mo ki hil ap̱o/ uni kun dar gi gwo jin gamu is mo dhali o gwo waḵ mo, haali/ uni ’koki dhu gwoŋḵan pini jin ḵana /eya ḵan mo.

¹⁵⁹Hili isi gwo i e mo ma. Gwoŋḵan gi ’twam pini si’da/ enka/ kata mo. ’Tashi mondiki/em pem ’twa/ mo isi ki gwo gi mo/en pini jin ṯelu sho’k mo.

¹⁶⁰Gumm gwom pini a’di ita gwoŋ gana/ mo dhali aris gwoŋḵan pini kun onu ’baar ka ’deṯe/ ’deṯe/ mo tani uni ita kuŋ ḵar/e mo dhali uni ’dimki ’kup̱ ki sule/ sule/ mo.

¹⁶¹Iya/ ma maliḵ uni ṯo’cki aha/ bwa ka wuny is kan mo, hili adum pem doshki’d ki moŋḵo/ is gom gwom pini mo.

¹⁶²Aha/ ’kunykina bwa e gwom pini mo mmowa e ki jan ’de/ jin gamki dhan to jin caaca jin dilu mo.

¹⁶³Aha/ shina shi/ i e mo dhali ’te bwa ki gwon thus mo, hili aha/ ena gwoŋḵan pini jin c̱inu mo.

¹⁶⁴Me’di pesu/ ka tee mo tani aha/ maŋkina /e mo goma ḵar/em pini jin tana /e gom gwoŋḵan pini kun onu mo.

¹⁶⁵Dhan moŋḵu’th is jin caaca tana uni gwansan kun enki gwoŋḵan pini jin c̱inu mo. To p̱iyi’d jin midi kol uni mo.