GWAY GI IDAWUU’D 119:103-126

¹⁰³Gwom pini wana ’kuny kata si’da/ mmonyoḵka/ a’di mo. A’di c̱a’bki dhel dhel mmobola dham e e ’twam pem mo.

¹⁰⁴E gwoŋḵan gi ’twam pini mo tani a’di ibu’thkika/ mo jin mishu gwo ’ban mo. A’di ishi/kika/ aris bway thusi e wakan mo.

¹⁰⁵Gwom pini a’di ta’da lamba/ gom sho’k pem mo dhali moŋkush gom bway tur pem mo.

¹⁰⁶Aha/ thulkina gwo me’da p̱o/ mo dhali o gwo is mo dhali rwa’c a’di mo mmomii gwoŋḵan pini kun onu mo kun tana ḵar/e mo be.

¹⁰⁷Aha/ wo’ckunu is she/ mo mmobur is ki wap̱ wap̱ mo. C̱iyi aha/ mondiki/e mo, ayy Tap̱a, isi ki gwom pini mo.

¹⁰⁸Budhi tom pem jin c̱ika/ ki me’d ki momaŋ mo, ayy Tap̱a, dhali ṯori aha/ gwo gom gwoŋḵan pini kun onu mo.

¹⁰⁹Aha/ butha mondiki/em pem e me’d pem ki sule/ sule/ mo, hili aha/ dinaki ŋa gwoŋḵan pini jin c̱inu mo.

¹¹⁰’Kwani kun ta thus ki thus mo tani uni ’thikina gume/ gom aha/ mo. hili aha/ dinaki per mo ’peni gwoŋḵan gi ’twam pini mo.

¹¹¹Gwonyc̱im pini uni ta mal pem ki sule/ sule/ mo. Nye, uni ita mom’bor bwa goma dum pem mo.

¹¹²Aha/ ḵa’dkina dum pem mo mmothim gwoŋḵan pini kun bahu ki sule/ sule/ mo ntagi ’pemen gi mony’cesh mo.

¹¹³Aha/ shi/kina ’kwani kun ’kona bwa ka susu/ i e mo, hili aha/ enkina gwoŋḵan pini jin c̱inu mo.

¹¹⁴/E ta mo jin bagka/ mo dhali agoŋgorom pem mo. Aha/ takina ga ’teŋ kap̱e/ e gwom pini mo.

¹¹⁵Iiku/ mo ’peni aha/ mo um kun mii to kun ta thus ki thus mo, ki aha/ mina ’taki dhu gwoŋḵan ma Arumgimis pem kun ’kwarkunu mo.

¹¹⁶Budhi aha/ mo isi ki gwom pini jin ona /e is mo ki aha/ mina di ki e mo, dhali dhalku/ ki dhal aha/ bway mo ki aha/ minu kar ki mo ma ’the is mo gom mom pem jin taka/ ga ’teŋ kap̱e/ mo.

¹¹⁷’Deki aha/ ki mis mo ki aha/ mina ’taki di ki ’dantar mo dhali mii gwoŋḵan pini kun bahu ki sule/ sule/ mo.

¹¹⁸/E waḵkina ris uni kun perkin mo ’peni gwoŋḵan pini kun bahu mo, nye, mo jin laṯa/ uniya laṯ e mo tani a’di di bwa ’te/ mo.

¹¹⁹Aris imanmii tonthus gi mony’cesh mo tani /e ki deŋ uni e me’d wushulan to mo. Wakan aha/ ena gwonyc̱im pini mo.

¹²⁰Buŋgwar is dee’d ki bir bir gom moŋḵo/ is jin ḵo/ka/ /e mo, dhali aha/ ḵo/kina is kagahara gom gwon dwall pini kun toru gwon dwall ’twa/a ’cesh mo.

¹²¹Aha/ miikina a’di jin ta’da ḵar/e mo dhali jin ’boro’d mo. Dhali dhalku/ ki dhal aha/ bway mo jin mina uni gwansan kun siri’c aha/ ap̱o/ ki sho’k mo ’koki siri’c aha/ ap̱o/ ki sho’k mo.

¹²²Tayi ki bwa ma ’dantar gom c̱iŋkinam pini mo, gom mom’bor piti mo. Dhalku/ ki dhal ’kwani kun molina gayiin ga/ bway mo mmosiri’c aha/ ap̱o/ ki sho’k mo.

¹²³Em pem ushki me’d mo mmotim bway mowoṯẖ pini mo, dhali gom gwom pini jin minu thim jin ona /e is ki o ma ḵar/e mo.

¹²⁴Ṯu/uli nyaḵki c̱iŋkinam pini mo isi ki gwo gi mo/en pini jin ṯelu sho’k mo, dhali ṯori aha/ gwo gom gwoŋḵan pini kun bahu mo.

¹²⁵Aha/ tana c̱iŋkinam pini mo. C̱iyi aha/ mo jin mishu gwo ’ban mo ki aha/ mina ’taki mish gwonyc̱im pini mo.

¹²⁶A’di ta’da tee gi Tap̱a jin mina a’di ḵal mii mo, haali/ gwoŋḵan pini jin c̱inu mo tani a’di ’ce’dkunu bwa mo.