Godigo Sęba Tagala Palai Bidigo Po 27:3-22

³Tama pelama, do kigamu geba tuagasabo pesageba sabolali, te bulu nogi Saidon. Te ami tobolu bidi Julius agai Polbolo dwagi yai kolesaga yali. Agai Pol tagala palama, Pol aga abagi dabe sugi pelama, augwaligo agabolo tubo nai dabe mani.

⁴Tama nosali dago te Saidon bulu tagalama, ma pelama, te moni bomai wali da pabo guni badu asobaso, dago geba guni tubo bidigo te tamu ąį tomode dwasianu bulu elalubo, te bulu nogi Saiprus, teba guni dodolali. Te tǫ pąde moni wali meni yai.

⁵Tama te Saiprus tǫ ela soali, da te moni tamu ąį tomodu pali, te gebadu. Pelama, te bulu si ela pali, te nabis sesegede, te bulu si nogi me Silisia tǫ, me Pamfilia tǫ da. Tama te nabis sesegede bulu meba sabolali, te be nani nogi Maira, te Lisia tǫde, tama dago geba tede gebelali.

⁶Tama tede dago te geba tagalama, te da tonalubo amigo geba me kegegi suali. Te geba te Aleksandria bulu bidigo geba, augwaligo Romba pai hagede ebo suali. Tama te ami bidi dabe augwaligo da te gebadu selasa pali.

⁷Te moni geba mudu da Maira tagalama, ma pelama, dua dua tama pali. Magi basowe? Moni bomai waligo da bomonama sela sąbaso. Tama da hauwa sogonu tamu ąįdu bilali, te Nidas buluba polo sabalobeo. Tialima, te waligo naga dago pabo tų ma sinia sali. Tama da te tamu ąį tomode bulu me elalubo, te bulu nogi Krit, te bulu pąba sabolama, tamu ąį sesege badu pali, tede te moni wali meni baso. Tedu pelama, Salmone tǫ dugulidu bobegegi pali.

⁸Tama da te moni tamu ąį sesegedu pali, tama te bulu sesegedu pali, te geba guni tubo bidigo moni sę mu elama, geba tubo pesageba tugi pali. Tama augwaligo te ‘dwagi yai geba tubo pesage dao’ nogi wabo dao. Te geba tugi pabo pesage Lasia be nani pąde da.

⁹Te da tede olo dali bidibadi, hauwa sogo mu tama bidali. Tama tede bidibadi, tamu ąį bǫį holobo sogo pąde yagasali. Te poluade tama moni wali asobo dao. Te kibu be yabo pąde yagasali, te Juda dabe augwaligo Godibolo nai ula mabo moni lotu wabo sogo silai dao. Godigo augwa dwai kolesaga yai sela sąmainu, te moni nogi elalubo lotu po wabo side dao, te sogo augwa tubo nai osogo gisilai dao.

¹⁰Tama tebo sogo silibaso, te moni wali asobo sogo pąde yagasobaso, Pol agai te bidi dabe tau selama, bobelabo po wali, “Abagi dedeo, da moni gebadu tedu peyu da, te dwali, te da moni waligo geba dolama, da me, walu dabe tigidali me, da tamu ąį tomode dolama, isilaibao,” wali. “Da ede bolo me bidinao,” wali.

¹¹Tiali goli te sogo augwaligo Polgo wali po odama, te moni geba page bidi me, te moni geba tobolu bidi me, augwali sigo Polgo po sela sąyani. Tama te ami tobolu bidi agai Polgo wali po tagalama, te bidi sigo wali po wali pali.

¹²Tama augwaligo umabo po wali, tama bidi dabe me badu augwaligo homugo ‘E bulu taga pelama, gasa bulu dwagi yai geba tugi pabo pesage te bulu Finiks badu pinao,’ wali, ‘Krit tǫba.’ ‘E geba tubo pesagede moni wali asobo sogo bugagia bidigobeo. Tama tibaso, dago geba te Finiks buluba selasa pinao, te dwagi yai geba tubo pesage giliga pabo badu elalubo dao. Te pesagede wali aselama, geba dolobo menio,’ wali. ‘Te moni wali asobo sogo da pelama, te buluba bidigi pinao,’ wali.

¹³Te tialima, dwasianu dwagi yai wali me deli te saut badu tamu ąįdu asali, te geba tudi badu. Te geba tomode sę ebo bidi dabe augwaligo homugo ‘E waligo da te Finiks buluba sela paibao,’ homu yali. Tama tibaso, pomai hagede, augwaligo te geba dąų walobo moni sęgę yai ain dili tiwai nai tamu ąį pudu ugwaba guduama, geba daiba munama, tama augwa te bulu pąde tamu ąį sesegedu pali, te bulu nogi Kritba.

¹⁴Tiali goli, tama pelama goli, moni wali mu polo asali, te Krit tǫba pedai badu asali. Augwaligo te tobage moni wali mu nogi ‘te giliga asoboba polobadu pobase nogo pedai badu asobo wali dao,’ nogi wabo da.

¹⁵Tama te wali polo aselama, te geba bomo elama pogolama sabilali. Tama dago te wali asoboba geba guni dodolai hagede, sę bomo yali. Tiali goli, dago usu ebe. Tama te geba te waligo selasa pomai hagede tagalali.

¹⁶Tama da te dwasianu bulu me nogi Kauda tǫ pąba asali, te tamu ąį tomode elalubo tǫ. Tama da uba pedai badu te bomai wali meni yai madigi pali. Tama te dwasianu geba moni gebade bono polobadu gebelama, kegasa asobo dao. Tama te moni gebade sę ebo bidi dabe augwaligo homugo ‘Te dwasianu geba hagaidali weyu, dago selama, moni gebaba muinao,’ wali. Tama augwaligo te dwasianu geba kegebo moni sę mu yali. Tama augwaligo te dwasianu geba kegelama, moni geba daiba munama, tama bonogo bugagia kęani. Te kęna silama, tama gasa bono me selama, te bono ąįba sąnama, a dologo badu solama, te bono gąų yai naigo selama, te moni gebade kęani, te geba dilide dąų olama, kęani. Te moni geba bomo te tiwai munama, da ma pali. Te moni gebade sę ebo bidi dabe augwali te waligo geba te Libia buluba pobogolo pobaso, augwali moni wi mu yali. Te nabis bulu dwai nagame yai kemi ebo pesagedu painu ebaso, wi mu yali. Tama tibaso, augwaligo te moni ugwa aiyaba dagala muani, te moni geba waligo naga tamu ąįdu olo dali sabilimainu tagalali.

¹⁸Tama te moni wali mu asiyu, ąį bǫį me kisu mu dela pali. Tama tibaso, do te moni gebade sę ebo bidi dabe augwaligo te walu dabe me badu tama ąįba sąbo gagalali, te geba yadala pomainu yali.

¹⁹Tama te sogo ma te gebade sę ebo bidi augwaligo te gebade muani ni me, te bono me, te nami ugwa me augwaligo nogogo selama, sąyani.

²⁰Tama da te moni tamu ąįde hauwa sogo bidali, te tulubage me, te pǫ me kisu dali, dago dagalu sube. Tama dago te giliga me, hǫ me hauwa sogo sube, te hǫgo dago bulu te badu elaluba homu ebe. Tama te moni wali agai te moni ąį bǫį hodolali. Tama tibaso, da gisiga bidibe. Dago te homu yali, ‘Da tigidali e gebade tamadi isilaibao,’ homu yali.

²¹Te da nai hauwa sogo tube. Tama nosali Pol agai te geba tomode sę ebo bidi augwalibolo i olama, te po wali, “Te bidi hauwa, dagego odao. Dagego eno polobadu wali po sela sąyanio. Dagego eno po odama, te bulu Kritde bidigi sogo da, teda usu egi dao. Tama da e tiwai sę egi menio. Tiali goli duga eno po sela sąyanigo da, nai hauwa bage te hagela silali dao.

²²Tiali goli, megi eno homugo dage dąų walobe dao. Dagego wi elama, moni homu egio. Magu menio. Da bidi da me isigobeo. Tiali goli, te moni geba naga dolaibao,” wali. “Eno koneanio, te po mu dao. Magu menio.