Wiawia 27:3-22

³Mandan ran o se leler Sidon. A Iulius me kadek ong Paulus, ap mueid ong i, en kotila ren kompokepa ko pwen kasarloleit.

⁴Kit ari maselar sang wasa o, ap tangatang panangen Sipern, aki ang me u dong kit.

⁵Kit tangatang kotela lepen sed en Silisia o Pampilien, se ap lel ong Mira en Lisia,

⁶I wasa kaun en saunpei o diarada sop en Aleksandrien pot, me pan maselang Italien, i ari kasau ong kit poa.

⁷A kit pwapwand kokola, pong toto meid apwal ong kit lel ong Knidus, pwe ang me kawela; kit ari tangatang panangen Kreta, tang wong Salmone.

⁸A meid apwal at dauli wasa o; kit ari lel ong sap eu, me ad a Kapitau mau koren iong kanim Lasäa.

⁹A ansau lao daulier o a apwalar ong sailok sili, aki ran en kaisesol daulier, Paulus ap kotin panaui o

¹⁰Masani ong irail: Ol oko, i asaer me sailok wet pan suedela a pan apwal kaualap, kaidin ong audepan sop o sop eta, pwe pil ong maur atail.

¹¹A kaun en saunpei o liki saunilil o saumas en sop o sang masan en Paulus.

¹²A kapitau me sota non mau ong sop en mimieta ni ansaun kapau. Koren iong karos ari men samala sang wasa o, o re song, ma re sota kak ong lel Pöniks, pwen mimita wasa o ni ansaun kapau, i kapitau en Kreta eu, me mi ni pali air o pali apang.

¹³A ang lao udo sang pali air, re ap kiki ong, me re pan pwaida, ap apiada paipung ko tangala liman Kreta.

¹⁴A madang melimel udo sang Kreta, me ad a alepip en kisiniang.

¹⁵A ang lao kapeila sop o, o sop solar kak ong, kit ap nenenla o peila.

¹⁶Ni at tangala panangen dake tikitik eu, me ad a Klauda, me tar kis, a se solar kak ong koledi pot o.

¹⁷Irail apiada i, pwen kak piradi ong ni sop o, ap lilidi, pwe re masak re de serada nan Sirte, ap pungipungidok sili.

¹⁸Kit lao pungipungidok sili kaualap, manda ap kamararadar sop o.

¹⁹A ni ran kasilu irail kase kila pein pa arail kapwa en sop o.

²⁰Kadekadeo ran totola sota katipin o sota usu, o melimel kalaimun u dong kit, ap solar at kaporopor en pitila.

²¹A kit lao kaisesol warailar, Paulus ap pwarada nan pung arail masani: Ol oko mak eta, komail en peiki ong ia er o so masel sang Kreta, pwe kitail ender lel dong kaupatail.

²²A met i panaui komail, en kaporopor mau, pwe sota me pan mela, sop eta me pan ola.