Gesami Hea:su 40:3-13

³E da nama gesami gaheabolo hea:ma:ne olelei. Amo gesami da Godema nodone hea:su gesami. Dunu bagohame da amoba:le dawa:digili ilia da Hina Godema dafawaneyale dawa:mu.

⁴Nowa dunu ilia da Hina Godema dafawaneyale dawa:sa, amola ogogole loboga hamoi ‘gode’ ilima hame fa:no bobogesa, amola dunu ilia da ogogosu ‘gode’ ilima nodone sia:ne gadosea ilima hame gilisisa, amo dunu ilia da hahawane bagade gala.

⁵Ninia Hina Gode! Di da ninima liligi bagohame hamoi dagoi. Dunu afae Di agoai da hamedafa gala. Di da nini fidima:ne, ilegesu ida:iwane bagohame hamoi dagoi. Na da amo ilegesu huluane olelemu da hamedei. Ili idimu da hamedei.

⁶Di da gobele salasu amola Godema iasu amo hame hanai. Di da ohe oloda da:iya gogo gobele salasu amo hame adole ba:sa. Amola Di da wadela:i hou fadegale fasima:ne, gobele salasu hou amo hame hanasa. Be amo mae dawa:le, Di da nama nabasu hou hamoma:ne, ge hahamonesi.

⁷Amaiba:le, na da Dima amane adole i, “Na da goea! Dia nama hamoma:ne sia:i da Sema Buga amo ganodini dedei diala.

⁸Na da Dia hanai amo hamomusa: bagadewane hanai galebe. Dia malasu da na dogo ganodini diala.”

⁹Hina Gode! Dia dunu huluane gilisi amo ganodini na da sia: ida:iwane gala ilima olelei. Amo sia: da ‘Di da nini gaga:lala’. Di dawa:! Amo sia: olelebe, na da hamedafa yolesimu.

¹⁰Na da Dia gaga:su hou olelebe amo nisu hame gei dialu. Na da eso huluane Dia mae fisili fidisu hou olelelalu. Dia dunu huluane gilisi amo ganodini na da mae ouiya:le, Dia mae fisili asigidafa hou olelelalu.

¹¹Hina Gode! Na dawa:! Dia da nama gogolema:ne olofosu asigidafa hou hamedafa dagolesimu. Dia da nama mae fisili asigidafa hou hamonanebeba:le na da gaga:i dagoi ba:lalumu.

¹²Na da bidi hamosu bagohame amoga sisiga:le disi. Amo bidi hamosu da idimu gogolei ba:sa. Na wadela:i hou ilia se dabe iasu da nama doaga:i dagoi. Na da si dofoi agoai galebe. Na wadela:i hou idi da nina: dialuma hinabo idi baligisa. Amaiba:le, na da bagadewane beda:i.

¹³Hina Gode! Na gaga:ma! Wahadafa, na fidima!