Gesami Hea:su 32:3-11

³Na da na wadela:i hou hame sisane fofada:i ganiaba, amogalu na da eso huluane dini ianu, na da:i da gasa hame ba:i.

⁴Hina Gode! Di da nama hayoga amola gasia nama se bidi iasu. Hano da odega esoi amoga hafoga:sa amo defele, na gasa huluane da gogaea:i ba:i.

⁵Amalalu, na da na wadela:i hou amo Dima sisane fofada:i. Na wadela:i hou huluane, na da Dima hame dedeboi. Na da huluane Dima sisane fofada:musa: dawa:i. Amola Di da amo wadela:i hou huluane gogolema:ne olofoi.

⁶Amaiba:le, Dima mae fisili dafawaneyale dawa:su dunu da bidi hamosu ba:sea, Dia fidima:ne sia:ne gadomu da defea. Amasea, bidi hamosu da hano heda:i defele manebe ba:sea, amo da ilima hame doaga:mu.

⁷Di da na wamoaligisu sogebi agoai gala. Bidi hamosu da nama mae doaga:ma:ne, Di da na gaga:mu. Na da Dia gaga:su hou dawa:beba:le, ha:giwane gesami hea:sa. Bai Di da na gaga:lala.

⁸Hina Gode da amane sia:sa, “Na da dia masunu logo agoane masa:ne olelemu. Na da dima dawa:digima:ne sisasu olelemu.

⁹Hosi amola ‘miule’ da gagaoui agoane. Dunu da ili dawa:digima:ne, gula misili amoga adonana ahoa. Be amo defele, dilia gagaoulewane mae hamoma.”

¹⁰Wadela:i hamosu dunu da se nabasu ba:mu. Be dunu amo da Hina Godema dafawaneyale dawa:sa, amo da Ea mae fisili asigidafa hou amoga gaga:i dagoi ba:sa.

¹¹Dilia moloidafa dunu! Obenane amola hahawane nodoma! Bai Hina Gode Ea hamoi da noga:idafa. Ema nabasu dunu, dilia! Hahawaneba:le, wele sia:ma!