SALMOS 32:3-11

³Quema aya nijpohuilijtoya TOTECO queja nitlajtlacolchijtoya, semilhuitl nitlaijiyohuiyaya hasta nijmatqui para tlantoya nochicahualis.

⁴Tinechtlatzacuiltiyaya tonaya huan tlayohua. Tinechtlatzacuilti hasta nijmatiyaya nicuahuaquiyaya queja soquiatl huaqui quema chicahuac tlatotoniya.

⁵Pero teipa nimitzpohuili nochi notlajtlacolhua huan niyon se ax nijtlati. Nimotemacac nimitzpohuilis nochi notlaixpanolhua huan ta, TOTECO, nochi tinechtlapojpolhui, huan tinechquixtili nopa tlaeticayotl.

⁶Monequi para nochi tlen moaxcahua mitztemose quema itztoque ipan cuesoli. Monequi motemachise ipan ta, huan yonque cuesoli momiyaquilis queja se atlajtli tlen chicahuac mixcuepa, ax quinajsis.

⁷TOTECO, ipan ta nimotemachía quema onca cuesoli, huan ta tinechmocuitlahuía. Tijchijtoc para sequinoc ma nechyahualoca, huan inijuanti huicaj chicahuac para mitzhueyichihuase pampa tinechmanahuijtoc.

⁸TOTECO quiijtohua: “Na nimitztlalnamictis huan nimitznextilis nopa ojtli tlen más cuali, tlen monequi ipan timonejnemiltis. Na nimitzconsejomacas huan nimitztlachilijtos.

⁹Amo ximochihua queja se cahuayo, o se mula tlen ax quipiya tlalnamiquistli, tlen monequi tijtlalilis se tepos camachali ica se mecatl huan tijtilanas para ma mitzneltocas.”

¹⁰Ax cuajcualme quipantise miyac tlaijiyohuilistli, pero tojuanti tlen timotemachíaj ipan TOTECO, yajaya techyahualohua ica iteicnelilis.

¹¹Xipaquica ipan TOTECO, imojuanti tlen initztoque xitlahuaque iixpa. Imojuanti tlen inquineltoquilíaj, xitzajtzica ica paquilistli ipampa tlen TOTECO quichijtoc.