Gesami Hea:su 30:3-12

³Di da na bogosa:besa:le gaga:i dagoi. Na da bogosu hagudu amoga ahoanu galu, be Di da na bu esaloma:ne hamoi.

⁴Hina Gode Ea mae fisili dafawaneyale dawa:su dunu, dilia! Hina Godema nodone Gesami hea:ma! Hadigi Gode Ea hamoi amo dawa:beba:le, Ema nodone sia:ma.

⁵Ea ougisu hou da wahamusu diala. Be Ea noga:idafa asigi hou da gebewane dialumu. Gasi ganodini, si hano da dalumu. Be soge hadigisia, hahawane hou da doaga:mu.

⁶Na da gaga:i dagoi dawa:beba:le, nisu amane sia:i, “Na da enoga hamedafa hasalimu.”

⁷Hina Gode! Di da nama hahawane hamosu. Di da nama goumi da:iya gagili sali diasu agoane galu. Be amalu Di da na, Di mae ba:ma:ne, wamoaligimusa: asi. Amola na da beda:i galu.

⁸Hina Gode! Na da Dima wele sia:i. Na da Dia na fidima:ne edegei.

⁹Na da bogosea, adi bidi da doaga:ma:bela:? Na da bogole, uli dogosea, adi bidi da doaga:ma:bela:? Bogoi dunu da Dima nodone sia:mu dawa:sala:? Ilia da Dia mae fisili noga:idafa hou amo eno dunuma olelemu dawa:sala:? Hame mabu!

¹⁰Hina Gode! Na sia: nabima! Nama asigima! Hina Gode! Na fidima!

¹¹Di da na da:i diosu hou afadenene, nodone gosa:le iasu hamoi. Di da na da:i dioi hou fadegale fasili amola hahawane hou amoga na sisiga:lesi.

¹²Amaiba:le, na da hame ouya:i dialumu. Na da Dima nodone gesami hea:su hamomu. Hina Gode! Di da na Godedafa! Na da gebewane dima nodone sisia: ahoanumu.