GWAY GI IDAWUU’D 30:3-12

³Ayy Tap̱a, /e ’cwamkina aḵashiram pem ’pena Haawiya mo, dhali war aha/ mondiki/em pem is mo ’peni bwaman uni gwansan kun iikin ka luŋgu’b e jisa ’kulga/ mo.

⁴Yuḵi gway mmomaŋ Tap̱a mo, ayy um piti kun dhunu ki she/ ki dhelel dhelel mo, dhali c̱iyi a’borim bwa i is gom gway piti jin ḵogu mo,

⁵Haali/ anyor piti di’d mo hili jasi gom ari mo mo, dhali mii ma ’them piti a’di di’d ki sule/ sule/ mo. Ko jin gwonu a’di midi di gom mon’thiny mo tani hili moŋ’kuny bwa a’di p̱u’dki’d mon’thamo/ mo be.

⁶Haali/ me’d aha/ mo tani aha/ ona gwo e mom pem jin isha to ka enthus mo ki: Aha/ minu ’koki joc̱ ki sule/ mo.

⁷Ki mii ma ’them pini mo, ayy Tap̱a, /e ṯelki aha/ sho’k mo me’d ’kuwosha turga/ jin ’bitha’bi’th mo. /E bagki jis/em pini mo tani dhali aha/ merkina mo.

⁸E /e mo tani ayy Tap̱a, aha/ gwokina mo dhali e Tap̱a mo tani aha/ karkina mo jin di’buwa di’b is mo.

⁹To wakata midi ’dap̱ e mowum pem mo waḵki/ aha/ yana ka ’cesh e jisa ’kulga/ mo? A/dhali mina bu’da ’ceshi maŋ /eya? A/dhali mina a’di iṯor mom pini jin tana /e a/isiŋ gana/ mowa?

¹⁰Ciḵi gwo mo ma, ayy Tap̱a, dhali miiyi mii ma ’the gom aha/ mo. Ayy Tap̱a, wari /e ka manwoṯẖ aha/ mo ma.

¹¹/E ṯu’kki moŋkom pem ki mo jin p̱eka/ imis mo. Dhali /e ’cuḵki aha/ burrinyen shawaal mo dhali ’kam aha/ ki moŋ’kuny bwa mo,

¹²ka ḵashiram pem midi maŋ /e mo dhali diki di ki shwamm mo. Ayy Tap̱a Arumgimis pem mo, aha/ mina c̱i /e mo jin ’boruwa ’bor bwa i is ki sule/ sule/ mo.