Genesis 23

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

43

44

45

46

47

48

49

50

¹Is keluǥayad te untung ni Sara 127 he tuig.

²Diyà sikandin mebpatey te inged he Kiriat Arba (he iyan en guntaan inged he Hebron) diyà te tanà he Canaan. Utew inlalew ni Abraham is kebpatey ni Sara.

³Ne mid-ewaan din dèpa is esawa zin he minatey ne midhendiyà te menge Hitihanen ne migkeǥiyan din sikandan te,

⁴“Nekeubpà a kayi te lugar niw he sevaha he lumelengyawè dà, umbe emun egkehimu ipepemsa a keniyu te tanà he edlevengan ku te esawa ku.”

⁵Ne midtavak dutun is menge Hitihanen te,

⁶“Datù, pemineǥa nu is egkeǥiyen dey. Migkilala zey sikew he telehuzen he etew, umbe egkehimu he minsan hendei nu idleveng is esawa nu kayi te pinekemeupiya he penlevengè dey. Wazà minsan hentei kenami he kenà ebeǥey kenikew te edlevengan te esawa nu.”

⁷Ne zutun, segugunà midluhud si Abraham diyà te etuvangan te menge Hitihanen he iyan tuus te kebpeselamat din.

⁸Ke sikandin te, “Emun idtuǥut niw he idleveng ku kayi is esawa ku, edhengyuen ku keniyu he melelaǥi ku si Efron is anak ni Zohar,

⁹su wey zin ivelegyà kayi te kedì haazà is surung he kilid te vevesukè din diyà te Macpela. Keǥiyi niw sikandin he ebeyazan ku te hustu he prisyu, kayi te etuvangan niw para egkehimu he penlevengè ku.”

¹⁰Ebpimpinuu zutun si Efron duma te menge zuma zin he menge Hitihanen, umbe midtavak din si Abraham diyà te etuvangan te langun he menge zuma zin he menge Hitihanen he midtiǥum dutun te pultahan te inged.

¹¹Ke sikandin te, “Kayi te etuvangan te menge zuma ku, ibeǥey ku kenikew is tivuuk he vevesukè ku ragkes sikan is surung. Umbe egkehimu en idleveng nu is esawa nu.”

¹²Ne mid-uman si Abraham medluhud he tuus te kebpeselamat din diyà te etuvangan te menge meǥinged dutun,

¹³ne migkaǥi sikandin diyà te ki Efron he nezineg te langun te, “Pemineǥa a. Egkesuatan ku he ebeyazan ku haazà is bevesukà. Dewata nu en is ibayad ku, su wey zutun ku en ikeleveng is esawa ku.”

¹⁴Ne midtavak dutun si Efron ki Abraham te,

¹⁵“Datù, pemineǥa a zep-a. Is bali zuen te tanà, ne 400 he vuuk he pelata, piru kenà haazà ebpekesamuk kenita te teleemiǥu. Kuwaa nu en is tanà ne igkeleveng nu zutun is esawa nu.”

¹⁶Ne mid-uyun dutun si Abraham sumalà is migkaǥi ni Efron, ne midtimbang din is 400 he vuuk he pelata sumalà is keveǥat he neuyunan he zaan te menge nigusyanti zutun. Ne imbayad din heini ki Efron dutun te etuvangan te menge Hitihanen.

¹⁷Umbe naangken ni Abraham haazà is bevesukà ni Efron diyà te Macpela, he uvey te inged he Mamre, ragkes is surung wey is menge kayu he nekeelibet dutun te vevesukà. Nepirmahan te langun he menge Hitihanen he nevurun diyà te pultahan te inged.

¹⁹Ne inleveng ni Abraham is esawa zin he si Sara ziyà te surung he ziyà te tanà he Macpela, he sakup te tanà he Canaan. Is Macpela uvey te Mamre he iyan guntaan kes inged he Hebron.

²⁰Umbe, is bevesukà ragkes is surung he iyan dengan teǥiǥaked kayi is menge Hitihanen, nehimu en heini he ki Abraham, ne midhimu zin heini he penlevengè din.